Elimizde kólik salasyndaǵy ǵylymı ınstıtýt qurylady

ASTANA. KAZINFORM – Kólik mınıstrligi salanyń búkil máselesin ǵylymı turǵydan zertteıtin ınstıtýt qurmaqshy.

Kópshilik talqylaýyna shyǵarylǵan zań jobasynda atalmysh ınstıtýtqa qandaı fýnktsııa beriletin aıtylǵan. Naqty aıtsaq, ýákiletti organǵa taldamalyq, konsýltatsııalyq, aqparattyq, tehnıkalyq qoldaý kórsetý júkteledi.

Sondaı-aq, kólik salasyndaǵy zańnamany jetildirý, halyqaralyq kelissózder men halyqaralyq kelisimderdiń jobalaryn ázirleýge atsalysý, kólik-logıstıka salasyna taldaý júrgizý, sheteldik jáne halyqaralyq uıymdarmen ózara is-qımyl jasaý fýnktsııalary bar.

Kólik salasyndaǵy memlekettik josparlardy júıeleý, saladaǵy reformalardy ǵylymı negizdeý, kólik salasynda irgeli jáne qoldanbaly zertteýler júrgizý, aqparattyq júıelerdi ázirlep, súıemeldeý, aqparattyq júıelerdiń tehnıkalyq aýdıtin júrgizý, tsıfrlyq transformatsııany iske asyrý. Bul fýnktsııalar da atalmysh ınstıtýttyń mindetine kirmek. 

Kólik salasyndaǵy aqparattyq habarlamalardy, jýrnaldar men taqyryptyq jınaqtardy, ǵylymı ádebıetterdi daıyndap taratý da osy ınstıtýttyń moınyna júkteledi. Sonymen birge forýmdar, konferentsııalar, semınarlar, trenıngter, kezdesýler ótkizýge jaýapty bolady.

Qujattyń túsindirmesi jazbasynda mundaı ınstıtýt Ońtústik Koreıa, AQSh, Germanııa, Qytaı, Reseı sııaqty elderdiń tájirıbesinde bar ekeni aıtylǵan.