Elimizde kóktemgi tasqynǵa qaramastan 26 mıllıon tonnadan astam astyq jınaldy

ASTANA. KAZINFORM - Memleket basshysy Qasym-Jomart Toqaev Respýblıka kúnine oraı ótken saltanatty jıynda aýyl sharýashylyǵynyń damý qarqynyna toqtaldy.

Prezıdent Qazaqstan álemdik azyq-túlik naryǵyndaǵy rólin kúsheıte beretinin atap ótti.

– Bul – azyq-túlik qaýipsizdigin qamtamasyz etý turǵysynan aıryqsha mańyzdy sala. Qazaqstan álemdik azyq-túlik naryǵyndaǵy rólin kúsheıte beredi. Qazir kúzgi jıyn-terin naýqany aıaqtalyp qaldy. Dıqandar qaýymyna shynaıy rızashylyq bildiremin. Kóktemgi tasqynǵa qaramastan 26 mıllıon tonnadan astam astyq jınaldy. Muny rekordtyq kórsetkish deýge bolady. Buǵan memleket tarapynan kórsetilgen naqty kómek te septigin tıgizgeni anyq. Bıyl kóktemgi egis naýqanyna beriletin arzan nesıe kólemi úsh ese kóbeıdi. Aýyl sharýashylyǵy tehnıkasyn lızıng arqyly alýǵa qosymsha qarajat bólindi. Jalpy, agroónerkásip kesheninde 865 joba júzege asyrylmaq. Onyń quny – 2,6 trıllıon teńge, – dedi Qasym-Jomart Toqaev.

Prezıdent elimizdegi kásipkerlik salasynyń órkendeý jolyna túskenin, shaǵyn jáne orta bıznes halyqtyń ekonomıkadaǵy belsendi bóligin jumyspen qamtyp otyrǵanyn atap ótti. Memleket basshysy eldiń iskerlik ahýaly men ınvestıtsııalyq tartymdylyǵyn odan ári jaqsartý maqsatynda mamyr aıynda Ekonomıkany yryqtandyrý jónindegi Jarlyqqa qol qoıǵanyn jetkizdi.

– Otandyq kásipkerler eldegi mańyzdy jobalardy júzege asyrýǵa belsene atsalysyp keledi. Olar mektepter, aýrýhanalar jáne basqa da áleýmettik nysandar salyp jatyr. Sondaı-aq ónerkásip pen ınfraqurylymdy damytýǵa ınvestıtsııa quıyp, qaıyrymdylyq bastamalardy qoldap júr. Bul – memleket pen bıznes arasyndaǵy jasampaz seriktestiktiń, bıznes ókilderiniń áleýmettik jaýapkershiliginiń aıqyn kórsetkishi, – dedi Prezıdent.