Elimizde kimderge úıinde qarý ustaýǵa tyıym salynǵan

ASTANA. KAZINFORM – Іshki ister mınıstrligi Kazinform saýalyna joldaǵan jaýapta azamattyq maqsatta qarý ustaý quqyǵy shektelgen azamattardyń sanatyn atady.

— Qarýdy ıelenýge medıtsınalyq qarsy kórsetpeler bolǵanda, sottylyǵy bolǵanda, turaqty turǵylyqty jeri bolmaǵanda, qarýdy saqtaý úshin tıisti jaǵdaılar jasalmaǵan jaǵdaılarda ishki ister organdary ony satyp alýǵa ruqsat berýden bas tartady. Mekenjaıdyń shekaraǵa jaqyn ornalasýyna jáne basqa da strategııalyq nysandarǵa irgeles bolýyna baılanysty atys qarýyn ustaýǵa zańnamada shekteýler kózdelmegen. Zańnamaǵa sáıkes azamattyǵy joq adamdardyń qarýdy satyp alýǵa jáne saqtaýǵa quqyǵy joq, - dep jazady mınıstrliktegiler. 

Zań boıynsha polıtsııa ókilderi úıinde azamattyq maqsatpen qarý saqtaıtyn adamdardy jylyna bir ret tekserip otyrýy kerek. 

— Qazirgi ýaqytta qarýdy ıelenýdi shekteý jónindegi sharalardy kúsheıtýdi kózdeıtin ózgerister josparda joq. 2025 jyldyń basynan qarý saqtaýdyń talaptaryn buzǵan 1 200 fakt anyqtaldy. Onyń ishinde qarýdy saqtaý jáne alyp júrý qaǵıdalaryn buzǵany úshin — 677, tirkeý jáne qaıta tirkeý qaǵıdalaryn buzǵany úshin — 591 adam ákimshilik jaýapkershilikke tartyldy. 

Quqyq buzýshylyq jasaǵan qarý ıeleri qarýdy qaýipsiz ustaý qaǵıdalaryn bilýin tekserý úshin emtıhandy qaıta tapsyrýǵa joldanady. Emtıhan tapsyrmaǵan jaǵdaıda ruqsattyń kúshi joıylady, - dep jazylǵan jaýapta.

Keshe ǵana birneshe oblysta qańtar oqıǵasy kezinde urlanǵan qarý-jaraqtar tabylǵany habarlanǵan edi.