Elimizde qyzylshaǵa qarsy 608 myńnan astam adam ekpe aldy
Elimizde qyzylshanyń taralýyna qarsy tıimdi kúres maqsatynda halyqty qosymsha jappaı ımmýndaý sheńberinde vaktsınatsııalaýǵa jatatyn 1,5 mln. adamnyń 608 myńnan astamy vaktsınatsııalandy, qamtý 40,5%-dy qurady, kún saıyn 30 myńnan astam adam ekpe alady. Bul týraly Kazinform QR Densaýlyq saqtaý mınıstrliginiń Sanıtarııalyq-epıdemıologııalyq baqylaý komıtetine silteme jasap habarlaıdy.
Budan ári qyzylsha boıynsha epıdemıologııalyq jaǵdaıdy turaqtandyrý maqsatynda Qazaqstan Respýblıkasynyń Densaýlyq saqtaý mınıstrligi jergilikti atqarýshy organdarmen birlesip birqatar shara qabyldap jatyr.
Máselen, qyzylshaǵa qarsy josparly vaktsınatsııalaý jalǵasýda, jyl saıyn 1 jáne 6 jastaǵy 700 myńǵa jýyq balaǵa ekpe salynady (DDU usynǵan keminde 87,1% kezinde 1 jastaǵy balalardyń 94,1%-y jáne 6 jastaǵy balalardyń 93,4%-y qamtyldy).
Sonymen qatar epıdemııalyq kórsetkishter boıynsha vaktsınatsııalaý júrgizilýde, buryn vaktsınatsııalaýdy ótkizip alǵan jáne odan bas tartqan 133,3 myńnan astam adam egildi.
Qyzylsha men basqa da vaktsınamen basqarylatyn ınfektsııalardyń profılaktıkasynda vaktsınatsııalaýdyń mańyzdylyǵy týraly halyqpen aqparattyq jumys jalǵasyp jatyr.
Qabyldanǵan sharalardyń arqasynda qazirgi ýaqytta elimizdiń kóptegen óńirinde qosymsha ımmýndaýdyń oń dınamıkasy baıqalady. Máselen, Mańǵystaý, Almaty, Aqtóbe, Jambyl, Túrkistan, Abaı, Ulytaý oblystarynda sońǵy aptada qyzylshadan qorǵaý maqsatynda óz balalaryn vaktsınatsııalaýda halyqtyń belsendiliginiń artýy baıqalady.
Búginde epıdemıologııalyq jaǵdaı turaqty baqylaýǵa alynǵan. Eldegi qyzylsha boıynsha qolaısyz epıdemıologııalyq jaǵdaıdy eskere otyryp, 5 jasqa deıingi balalardyń ata-analaryna qosymsha jappaı ımmýndaý sheńberinde qyzylshaǵa qarsy vaktsınatsııa alýdy, 5 jastan 18 jasqa deıingi balalardyń ata-analaryna qyzylshaǵa qarsy 2 ekpe bolmaǵan kezde, tolyqtyrý vaktsınatsııasy sheńberinde profılaktıkalyq ekpe alýdy usynamyz. Profılaktıkalyq ekpe alý úshin tek jumys kúnderi ǵana emes, demalys kúnderi de tirkelgen jeri boıynsha medıtsınalyq uıymǵa júginýge bolady.
