Elimizde qyzdar boksy tanymaldyǵynyń artýyna ne túrtki
ASTANA. KAZINFORM – Elimizde qyzdar boksynyń tanymaldyǵynyń artýyna áleýmettik jeli yqpal etip otyr. Bul týraly «Jibek Joly» telearnasynyń «Ýáde» baǵdarlamasyna suhbat bergen Qazaqstan Boks federatsııasynyń prezıdenti Shahmurat Mútálip aıtty.
- Qyzdar quramasynyń sońǵy nátıjesine qaraıtyn bolsaq, óte joǵary deńgeıde óner kórsetip, jetistikterge jetip jatyr. Qyzdarymyz bıyl eki álem chempıonatyna qatysty. Serbııanyń Nısh qalasynda ótken chempıonatta 3 altyn, 2 kúmis, 1 qola medal, al Lıverpýldaǵy álem chempıonatynda 3 altyn, 1 kúmis medal aldy. Ózderińiz baıqaǵandaı, sol jetistikter TikTok, Instagram syndy áleýmettik jelilerde keńinen tarady. Chempıon qyzdar túrli kontent túsiredi, ıaǵnı qyzdar boksy da keńinen nasıhattalyp, taralyp jatyr. Nátıjesinde qyzdar boksyna suranys óte joǵary, - dedi ol.
Osy oraıda QBF prezıdenti elimizde jasóspirimder 10 jasynan bastap qana bokspen aınalysa alatyndyǵyn aıtady. Al olar jarystarǵa 13 jasynan bastap qatysa alady. Bul halyqaralyq standarttarǵa da saı keletin jas shekteýi sanalady.
- Azııa chempıonaty, basqa da halyqaralyq jarystarda jasóspirimder 13 jasynan bastap qatysady. Ótken aptada mınıstrlik (Sport jáne týrızm mınıstrligi – red.) pen jattyqtyrýshylar, federatsııa tarapy úlken jıyn ótkizdi. Sol jerde jattyqtyrýshylarymyz mınıstrlikke jarysqa qatysý jasyn 12 jasqa túsirý týraly usynys berdi. Óıtkeni, 13 jastan jarysqa qatysýǵa bolady. El ishinde de jas shekteýi bolǵannan keıin jarysqa qatystyra almaımyz. Al Azııa chempıonatyna barǵan boksshylarymyz kóbine daıyn bolmaýy múmkin. Sondyqtan 12 jastan ishte jarystarǵa qatystyrsaq, birinshiden tájirıbe jınaıdy, ekinshiden irikteý bolady. Demek, shyn myqtylardy aparýǵa múmkindik týady. Al ondaı ishki jarystarǵa qatyspasa, 13 jasynda Azııa chempıonatynda qıyn soǵady. Tájirıbe bolmaıdy. Іshki jarystarǵa qatyspaǵan soń kimniń myqty, kimniń álsiz ekenin anyqtaý da qıyn, - dedi Shahmurat Mútálip.
Eske salaıyq, Qazaqstannyń áıelder quramasy 2025 jylǵy bokstan álem chempıonatynda medaldar sany boıynsha jalpykomandalyq esepte birinshi oryndy ıelendi. Sonymen qatar eldiń absolıýttik jeńisine zor úles qosty — 7 altyn, 1 kúmis jáne 2 qola medal.
Prezıdent Qazaqstan ulttyq quramasynyń múshelerin Álem chempıonatyndaǵy tamasha jeńisimen quttyqtap, bul elimiz úshin tarıhı oqıǵa, halqymyz úshin úlken qýanysh ekenin atap ótti.
- Ul-qyzdarymyz bokstyń otanyna baryp, ózderiniń naǵyz myqty sportshy ekenin dáleldedi, - dedi Prezıdent.
Oqı otyryńyz, qazaqstandyq boksshy Balaýsa Mýzdıman Chempıondar lıgasy aıasyndaǵy «Qaırat» pen «Real» arasyndaǵy matchqa qatysty boljam jasady.