Elimizde Qytaıdyń taǵy 3 kólik markasy qurastyrylýy múmkin

ASTANA. KAZINFORM – Elimizde taǵy úsh qytaılyq avtokólik markasy óndirilýi múmkin. Ónerkásip jáne qurylys mınıstri Qanat Sharlapaev Úkimet otyrysynda qazir bul másele jiti pysyqtalyp jatqanyn aıtty.

«Biz otandyq avtomobılderdiń CKD ádisiniń óndirisine nazar aýdaramyz. Bul degenimiz – elde shyǵarylǵan avtomobılderde otandyq komponentterdiń úlesin arttyrý. Osy baǵytta, sheteldik jáne otandyq ınvestorlar el aýmaǵynda jańa zaýyttar salý jumystary júrgizilýde», - dedi ol.

Mınıstrdiń sózinshe, atalǵan zaýyttardyń bári óndiristegi Qazaqstannyń úlesin birtindep arttyrýǵa mindet alady.

«Máselen, Changan, Haval, Chery avtomobılderin shyǵaratyn zaýyttyń qurylysy aıaqtalýǵa jaqyn, bul zaýytta CKD ádisimen jylyna 90 myń birlik avtokólik shyǵarylatyn bolady. Sonymen qatar, 200 mln dollarlyq KIA avtomobıl zaýytynyń qurylysy júrgizilip, 150 mln dollarǵa Geely, Exeed, KAIYI jeńil avtomobılder óndirisi pysyqtalýda. Budan bólek sektordy odan ári damytý avtokomponentterdiń otandyq óndirisin ıgerý esebinen josparlanýda. Mysaly, bıyl Almaty qalasynda mýltımedııalyq júıelerdiń jáne avtokreslolardyń serııalyq óndirisin iske qosý kútilýde», - dedi Qanat Sharlapaev.