Elimizde qysqy olımpıadalyq sport túrleri qalaı damyp keledi
ASTANA. KAZINFORM – Búgin Úkimet otyrysynda QR Týrızm jáne sport mınıstri Erbol Myrzabosynov elimizde qysqy sport túrleriniń damýyna qatysty túsinik berdi.
- Qazaqstanda 13 qysqy olımpıadalyq sport túri damyp keledi. Jalpy, 139 123 sportshy qamtylǵan, 1 838 jattyqtyrýshy qyzmet etedi. Soltústik óńirlerde klımattyq jaǵdaılardyń qolaıly bolýyna baılanysty sporttyq rezerv daıyndaýǵa erekshe kóńil bólinedi. Elimizde 521 balalar-jasóspirimder sport mektebinde 15 511 sportshy daıyndyqtan ótip jatyr, olarǵa 747 jattyqtyrýshy jetekshilik etedi, - dedi E. Myrzabosynov.
Onyń aıtýynsha, elimiz boıynsha 1 respýblıkalyq, 6 oblystyq jáne arnaıy olımpıadalyq rezerv mektep-ınternat-kolledjderi jumys isteıdi. Bul mekemelerde 500-den astam bala oqıdy.
Sonymen qatar, 11 olımpıadalyq rezerv daıarlaý ortalyǵynda 400-ge jýyq sportshy jattyǵady. 12 joǵarǵy sport sheberligi mektebinde 1 000-nan astam sportshy daıyndalady. Ulttyq quramalar qataryna 1 265 sportshy kiredi.
- Elimizde qysqy sport túrlerine arnalǵan 1 242 sport nysany jumys istep tur. Onyń ishinde 1 108 hokkeı alańy, 102 shańǵy bazasy, 22 muz arenasy, 7 konkı tebý stadıony, 3 shańǵymen sekirýge arnalǵan tramplın bar. Qazirgi ýaqytta jabyq sporttyq keshenderge suranys barlyq óńirlerde joǵary. Qazaqstanda qysqy sport túrleri tek kásibı deńgeıde ǵana emes, sonymen qatar buqaralyq sport retinde de damyp jatyr. Keıbir óńirlerde jattyǵý resýrstary men ınfraqurylymnyń shekteýli bolýyna qaramastan, bul sport túrleri halyq arasynda úlken qyzyǵýshylyqqa ıe bolyp, turaqty damyp keledi. Qabyldanǵan sharalardyń nátıjesinde dene shynyqtyrý jáne sportpen aınalysatyndardyń sany 310 myńǵa artyp, 8,4 mln adamǵa nemese halyqtyń 41,5% paıyzyna jetti. Olardyń ishinde aýyldyq jerlerde 3 mln-nan astam adam sportpen aınalysady, - dedi mınıstr.
Elimizde jyl saıyn 25 myńnan astam sporttyq-buqaralyq is-sharalar ótkiziledi. Oǵan 1,2 mıllıon adam, onyń ishinde aýyldyq jerlerde 500 myńnan astam turǵyn qatysty.
Budan buryn habarlanǵandaı, Qytaıda ótetin IX qysqy Azııa oıyndaryna Qazaqstannan 138 sportshy barady.