Elimizde qymbat medıtsınalyq jabdyqtardy paıdalanbaý faktileri anyqtaldy - mınıstrlik
ASTANA. KAZINFORM – Qazaqstanda 2024 jylǵa arnalǵan medıtsınalyq tehnıkany satyp alýdyń bekitilgen josparyna tereń taldaý jasalyp jatyr. Bul týraly Parlament Májilisinde medıtsına salasyn talqylaýǵa arnalǵan jıynda Densaýlyq saqtaý mınıstri Aqmaral Álnazarova aıtty.
«Byltyr jáne onyń aldyndaǵy kezeńde satyp alynǵan qymbat medıtsınalyq jabdyqtardy paıdalanbaý faktileri anyqtaldy. Astanada qymbat tehnıkanyń áleýeti tolyq paıdalanylmaı otyr. Bul turǵyda qarajatty ıgerýdiń joǵary tıimdiligin qamtamasyz etý maqsatynda 2024 jylǵa arnalǵan medıtsınalyq tehnıkany satyp alýdyń bekitilgen josparyna tereń taldaý jasalyp jatyr», - dedi A. Álnazarova.
Budan buryn habarlanǵandaı, mınıstr elimizde dári-dármekti tıimsiz paıdalaný problemasy áldeqaıda aýqymdy ekenin aıtty.
Sonymen qatar, Densaýlyq saqtaý mınıstrligi áleýmettik medıtsınalyq saqtandyrý júıesindegi mártebesine qaramastan, áleýmettik máni bar aýrýǵa shaldyqqan adamdarǵa medıtsınalyq kómek jasaý maqsatynda normatıvtik bazaǵa ózgerister engizedi.