Elimizde qylmys sany 13%-ǵa tómendegen — ІІM
ASTANA. KAZINFORM — Qazaqstanda kisi óltirý, qaraqshylyq, tonaý, buzaqylyq, urlyq jáne mal urlyǵy azaıdy, dep habarlady Іshki ister mınıstri Erjan Sádenov.
Memleket basshysy Qasym-Jomart Toqaevtyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Qazaqstan halqyna Joldaýyn jáne ózge de tapsyrmalaryn júzege asyrý sheńberinde Іshki ister mınıstrligi elimizde qaýipsiz qala jáne aýyldyq ortany qurýǵa kúsh salyp jatyr.
Kún saıyn 14 myńnan astam polıtsııa qyzmetkeri men Ulttyq ulannyń áskerı qyzmetshisi qoǵamdyq tártipti saqtaýdy qamtamasyz etedi.
Búginde 15 myńnan astam patrýldeý marshrýttary ázirlengen. Bul barlyq problemalyq aımaqty qamtýǵa múmkindik berdi.
Sonymen qatar, qaıtalanýy múmkin qylmystardyń aldyn alý boıynsha jumystar júrgizilip keledi. Mundaı sharalar eleýli nátıjeler beredi.
Osy jyldyń basynan bastap qoǵamdyq oryndarda jáne kóshelerde, sondaı-aq buryn sottalǵan adamdar arasynda quqyq buzýshylyqtar sanynyń azaıýy tirkelip otyr. Polıtsııanyń úılesimdi jumysynyń arqasynda 10 myńnan astam qylmys ashyldy, sondaı-aq 10 mln-ǵa jýyq ákimshilik quqyq buzýshylyqtardyń joly kesildi.
— Bizdiń jumystyń negizi — «Zań jáne tártip» qaǵıdaty. Aldyn alý sharalarynyń arqasynda qylmystar sany 13%-ǵa tómendedi. Bul ótken jylmen salystyrǵanda 9 myńǵa az. Kisi óltirý, qaraqshylyq, tonaý, buzaqylyq, urlyq jáne mal urlyǵy azaıdy. Buryn sottalǵandar jasaıtyn, qoǵamdyq oryndarda jáne qarý-jaraqpen jasalatyn qylmystyq quqyq buzýshylyqtar saıabyrsydy. Bul rette olardyń ashylýy jaqsardy, — dep atap ótti ishki ister mınıstri Erjan Sádenov.
Budan buryn Almatyda balalar zardap shegetin jol apattary 60 paıyzǵa artqany belgili boldy.