Elimizde keıingi 5 jylda orman aýmaǵy 267 myń gektarǵa artqan
ASTANA. KAZINFORM – Bıyl orman sharýashylyǵyn tehnıkalyq-materıaldyq bazamen qamtýǵa 52,0 mlrd teńge bólingen. Bul týraly Ekologııa jáne tabıǵı resýrstar mınıstri Erlan Nysanbaev málim etti.
«Qolǵa alynǵan sharalardyń arqasynda elimizdiń ormandy aýmaǵynyń kólemi 5 paıyzǵa artty. Keıingi 5 jyldyń ishinde respýblıkamyzdyń ormanmen kómkerilgen jeriniń aýmaǵy 267 myń gektarǵa kóbeıdi. Ormandardy saqtap qalý maqsatynda orman qorǵaý mekemelerin órtke qarsy tehnıkamen jabdyqtaý, orman sharýashylyǵyndaǵy qyzmetkerlerdi áleýmettik qoldaý boıynsha birqatar shara qabyldandy», - dedi Erlan Nysanbaev Úkimet otyrysynda.
Mınıstrdiń aıtýynsha, byltyr respýblıkalyq jáne jergilikti bıýdjetten 15,9 mlrd teńgege 526 birlik tehnıka satyp alyndy.
Bıyl orman sharashylyǵyn tehnıkamen qamtýǵa 52,0 mlrd teńge bólingen, onyń ishinde 40,0 mlrd teńge lızıng esebinen.
«Atalǵan sharalar elimizdegi jıi orman órti bolatyn óńirlerdegi orman qorǵaý mekemelerin 100% jaraqtandyrýǵa múmkindik beredi. Múddeli organdardyń birigip jedel áreket jasaýynyń arqasynda bir orman órtiniń alańyn ortasha alǵanda byltyrǵy 97 gektardan bıyl 64,5 gektarǵa deıin qysqardy. Onyń ishinde Semeı jáne Ertis ormany rezervatyndaǵy órt alańy ortasha 340 gektardan 0,2 gektarǵa deıin azaıyp otyr», - deıdi ol.
