Elimizde keıingi 5 jyl ishinde halyq sany 8,8 paıyzǵa ósti
14 qarashada Qazaqstan Respýblıkasy halqynyń sany 20 mıllıonǵa jetti. Elimizde keıingi 5 jyl ishinde halyq sany 8,8 paıyzǵa ósti, al eldegi balalardyń sany 6,6 mıllıondy qurady., dep habarlaıdy Kazinform.
Qazaqstan Respýblıkasy Densaýlyq saqtaý mınıstrliginiń málimetinshe, ótken jyly bosandyrý qyzmetiniń úılesimdi jumysynyń arqasynda 410 myń kishkentaı qazaqstandyq aman-esen dúnıege kelgen. 2023 jyldyń basynan bastap jańa týǵan nárestelerdiń sany 339 650-ǵa jetti.
Búginde elimizde 250 bosandyrý uıymy jumys isteıdi, onyń ishinde 39 perınataldyq ortalyq bar. Onda ana bolý qaýipsizdiginiń barlyq qaǵıdattary engizilip, salmaǵy 500 gramnan asatyn sábılerdi kútý úshin terapııa men reanımatsııanyń zamanaýı tehnologııalary qoldanylady.
Sábı jasyndaǵy aýrýlardy erte anyqtaý jáne ýaqtyly túzetý, emdeý maqsatynda skrınıngtik baǵdarlamalardy jetildirý boıynsha jumystar júrgizilip jatyr. Zat almasýdyń tuqym qýalaıtyn aýrýlaryn, sensorlyq buzylýlardy dıagnostıkalaýdyń jańa ádisteri erte aralasý, ómir súrý sapasyn jaqsartý jáne áleýmettik máni bar aýrýlardyń júktemesin azaıtý maqsatynda engizilýde. Respýblıka boıynsha júkti áıelderdi 1,2 mıllıonǵa deıin prenataldyq skrınıngpen qamtýdy eleýli arttyratyn 20 uryqty saqtaý ortalyǵy ashyldy. Neonataldyq skrınıngpen 400 myńnan astam jańa týǵan náreste, psıhofızıkalyq skrınıngpen – 3 jasqa deıingi 1,5 mıllıon bala jáne 6 jasqa deıingi 2 mıllıon bala aýdıologııalyq skrınıngpen qamtyldy.
Bıylǵy jyly perzenthanada 7,5 myń shala týǵan náresteler erte aralasý tásilin qoldaný jáne sábılerge dúnıeni kórýge kómektesý úshin retınopatııa skrınınginen ótti. Balalardyń densaýlyǵyn nyǵaıtý maqsatynda jyl saıyn týǵanynan bastap 18 jasqa deıingi balalarǵa profılaktıkalyq tekserýler júrgiziledi. Bıyl 9 aıynda 4,3 mıllıon bala profılaktıkalyq tekserýden ótti. Neonatologııadaǵy joǵary mamandandyrylǵan kómek damyǵan jaǵdaıda dene salmaǵy óte tómen balalardyń ómir súrý deńgeıi 4 ese ósti. Sábıler ólimi 1,5 ese tómendedi jáne búgingi kúni bul kórsetkish turaqty bolyp qalýda.
Memleket basshysynyń tapsyrmasyn oryndaý sheńberinde Qazaqstan Respýblıkasynda ana men bala densaýlyǵyn saqtaý qyzmetin damytýdyń 2024 – 2030 jyldarǵa arnalǵan «Árbir áıel – árbir bala» tujyrymdamasynyń jobasy ázirlendi.
Qazaqstandaǵy balalarǵa medıtsınalyq kómek kepildi kólem sheńberinde de, áleýmettik medıtsınalyq saqtandyrý júıesinde de tegin kórsetiledi, óıtkeni balalar memlekettiń esebinen saqtandyrylǵan. Jyl saıyn ambýlatorııalyq deńgeıde balalardyń 100 mıllıonnan astam konsýltatsııalyq-dıagnostıkalyq qabyldaýy tegin júrgiziledi, táýlik boıy statsıonarlarda 500 myńnan astam bala kómek alady, alǵashqy týǵan kúnderinen bastap kúrdeli joǵary tehnologııalyq aralasýdy qosa alǵanda, 100 myńnan astam operatsııa júzege asyrylady.
Aıta keteıik, balalardyń densaýlyǵyn saqtaý salasynda búginde 2 640 pedıatr, 773 neonatolog jumys isteıdi.
