Elimizde kedeılik kórsetkishi azaıdy
ASTANA. KAZINFORM — Ótken jyly elimizde kúnkóris mınımýmynan tómen tabysy bar 167 myń otbasy tirkeldi, bul - 2023 jylmen salystyrǵanda 2,9% ese az. Bul otbasylarda 968,8 myń adam ómir súrgen, bul da - ótken jylmen salystyrǵanda 4,3%-ǵa tómen. Bul týraly Finprom.kz resýrsy habarlaıdy.
Óńirlerge kelsek, kúnkóris deńgeıinen tómen tabysy bar otbasylardyń deni Túrkistan oblysynda tirkelgen, ıaǵnı 22,9 myń. Odan keıin Almaty, Shymkent, sondaı-aq Mańǵystaý jáne Jambyl oblystary ornalasqan. Al eń az kórsetkish Ulytaý oblysynda tirkeldi (2,1 myń).
Tabysy kúnkóris mınımýmynan tómen otbasynda turatyn turǵyndar sanyna kelsek:
- Túrkistan oblysynda — 180 myń adam
- Almatyda — 80,9 myń
- Shymkentte — 68,9 myń
- Jambyl oblysynda — 66,7 myń
- Mańǵystaý oblysynda — 63,5 myń adam.
- Eń tómengi kórsetkish Ulytaý oblysynda tirkeldi — 13,3 myń adam.
Kúnkóris mınımýmynan tómen tabysy bar adamdardyń kóbi bes jáne odan da kóp adamnan turatyn otbasylarda ómir súredi, ıaǵnı 825,8 myń adam. Tórt adamnan turatyn otbasyda — 92,4 myń adam, úsh adam bar otbasy — 36,6 myń, eki adam bar otbasyda — 12,9 myń, jalǵyz otbasynda 1,2 myń qazaqstandyq bar.
Byltyr 167 myń otbasynyń ishinen 4,2 myńynyń tabysy azyq-túlik sebetiniń qunynan da tómen bolǵan, bul kórsetkish bir jylda 25,5%-ǵa azaıǵan. Bul otbasylarda 28,3 myń adam turǵan, bul - 2023 jyldyń tórtinshi toqsanymen salystyrǵanda 16,9%-ǵa az.
Tabysy azyq-túlik sebetiniń qunynan tómen otbasylar Qazaqstannyń 20 óńiriniń tek 6-ynda ǵana tirkelgen. Atap aıtqanda:
- Shymkentte — 1,5 myń
- ShQO-da — 821
- Túrkistan oblysynda — 765
- Almaty oblysynda — 609
- Jambyl oblysynda — 473
- Ulytaý oblysynda — 54 otbasy.
Halyq sanyna kelsek, Shymkentte — 9,7 myń adam, Túrkistan men Almaty oblysynda — árqaısysynda 6,1 myń adam, ShQO-da — 3,2 myń, Jambylda — 2,8 myń, Ulytaýda — 380 adam.
Azyq-túlik sebetinen tómen tabysy bar otbasylar quramyna qaraı, 27,5 myń adam bes jáne odan da kóp adamnan turatyn otbasylarda turady, al 853 qazaqstandyq — eki adamnan turatyn otbasynda ómir súredi.
Kúnkórisi mınımýmnan tómen halyqtyń úlesi - 4,8%-dy, al azyq-túlik sebetiniń qunynan tómen tabysy barlar — 0,1%.
Tabysy kúnkóris mınımýmynan tómen halyqtyń eń úlken úlesi Túrkistan (8,4%), Mańǵystaý (7,9%) jáne Abaı (7,6%) oblystarynda tirkelgen. Eń tómen úles Astanada (2,1%), sondaı-aq Qaraǵandy (2,4%) jáne Atyraý (3%) oblystarynda baıqaldy.
Azyq-túlik sebetiniń qunynan tómen tabysy bar kedeı qazaqstandyqtardyń eń joǵary úlesi Shymkentte — 0,8%.
2024 jyldyń tórtinshi toqsanynda kúnkóris mınımýmy 51,7 myń teńgeni qurady, al tutynýǵa paıdalanylǵan ortasha tabys — 104,6 myń teńge. Tutynýǵa paıdalanylǵan tabystyń kúnkóris mınımýmy deńgeıine qatynasy — 202,2%.
Óńirler arasynda eń joǵary kórsetkish Qaraǵandy oblysynda tirkeldi: 272,4%. Odan keıin Almaty (268%), Astana (257,2%), sondaı-aq Soltústik Qazaqstan (238,1%) jáne Pavlodar (233,7%) oblystary. Eń tómengi kórsetkishter Mańǵystaý (134,8%), Túrkistan (142,7%) oblystarynda jáne Shymkentte (150,7%) tirkeldi.
Aıta ketsek, bıyldan bastap elimizde kedeılik shegi halyqtyń medıandyq kirisinen aıqyndalady.