Elimizde kedeı otbasylar azaıǵan
ASTANA. KAZINFORM – 2023 jyly jáne 2024 jyldyń birinshi toqsanynda ataýly áleýmettik kómek alǵan 58 445 otbasy memlekettik qoldaý sharalarynyń nátıjesinde kedeılik jaǵdaıynan shyqqan. Bul týraly QR Eńbek jáne halyqty áleýmettik qorǵaý mınıstrligi málimdedi.
Mınıstrliktiń málimetinshe, 2023 jyly jalpy somasy 59,4 mlrd teńgege 114,1 myń otbasy (598,4 myń adam), 2024 jyldyń úsh aıynda 7,8 mlrd teńgege 58,8 myń otbasy (312 myń adam) AÁK alǵan.
Ótken jyldyń qorytyndysy boıynsha óńirlik bóliniste AÁK alýshylardyń eń kóp sany Túrkistan oblysynda (27 myń otbasy) tirkelgen. Shymkent qalasynda – 12,7 myń otbasy, Almaty – 9,5 myń otbasy, Qyzylorda oblystarynda 9,4 myń otbasy AÁK alǵan.
AÁK alýshylardyń eń az sany Ulytaý (538 otbasy), Atyraý (1,1 myń otbasy) jáne Soltústik Qazaqstan oblystarynda (1,6 myń otbasy) turady eken.
«AÁK-niń negizgi maqsaty – aqshalaı tólemder túrindegi qoldaýdy júzege asyrý jáne otbasynyń eńbekke qabiletti múshelerin jumyspen qamtýǵa járdemdesýdiń belsendi sharalaryna tartý arqyly otbasyn qıyn ómirlik jaǵdaıdan shyǵarý», - delingen mınıstrliktiń habarlamasynda.
AÁK kelesilerdi kózdeıdi:
• tabysy óńirlik eń tómen kúnkóris deńgeıiniń 70%-nan aspaıtyn azamattarǵa toqsan saıyn áleýmettik kómek taǵaıyndaý;
• 1 jastan 6 jasqa deıingi tabysy az otbasylardaǵy ár balaǵa 1,5 AEK mólsherinde aı saıynǵy qosymsha tólem berý.
• jumysqa ornalastyrý jolymen jumyspen qamtýǵa járdemdesý, oqýǵa jiberý, óz isin ashýǵa yntalanǵan otbasylarǵa granttar berý jáne t.b.
