Elimizde qaıyrymdylyq uıymdarynyń biryńǵaı tsıfrlyq bazasy jasalady
ASTANA. KAZINFORM — Kelesi jyly qaıyrymdylyq uıymdarynyń jumysy, jobalary men qarjysy týraly aqparat jarııalanatyn biryńǵaı tsıfrlyq baza iske qosylady.
Tıisti qaǵıda Mádenıet jáne aqparat mınıstri mindetin atqarýshynyń 2026 jylǵy 9 qazandaǵy buıryǵymen bekitildi. Qujatqa sáıkes, jańa resýrs qaıyrymdylyq qyzmetiniń ashyqtyǵyn qamtamasyz etýge baǵyttalǵan. Bazaǵa ornalastyrylǵan málimetter barshaǵa qoljetimdi bolady.
Platformada tirkelý úshin uıymdar elektrondy ótinim berip, zańdy tulǵanyń memlekettik tirkeýden ótkenin rastaıtyn anyqtamany qosa usynýy qajet. Qujattar tekserilgennen keıin uıymdarǵa jeke kabınetke qol jetkizý múmkindigi beriledi.
Tirkelgen soń, uıymdar bes jumys kúni ishinde júıege qaǵıdalarda kózdelgen málimetterdi engizýge mindetti. Eger aqparat tolyq bolmasa nemese sáıkessizdikter anyqtalsa, ony belgilengen merzimde túzetý kerek.
Esepti qashan tapsyrý kerek
Qaǵıdaǵa sáıkes, qaıyrymdylyq uıymdary jyl saıyn qyzmeti týraly esepterdi qazaq jáne orys tilderinde jarııalaýǵa mindetti. Ony esep berip otyrǵan jyldan keıingi jyldyń 31 naýryzyna deıin ornalastyrý qajet.
Ýákiletti organ eseptiń ýaqytyly jarııalanǵanyn, barlyq tıisti bólimderdiń toltyrylǵanyn jáne usynylǵan aqparattyń shyndyqqa sáıkestigin tekseredi.
Uıym týraly málimetter ózgergen jaǵdaıda, túzetýlerdi 10 jumys kúni ishinde engizý kerek. Budan bólek, tsıfrlyq bazadaǵy aqparatty keminde ár toqsanda bir ret jańartyp otyrý mindetti.
Jańa qaǵıdalar 2027 jylǵy 1 qańtardan bastap kúshine enedi.
Aıta keteıik, buǵan deıin qaıyrymdylyq uıymdarynyń biryńǵaı tizilimi jasalatynyn jazǵanbyz.
