Elimizde qaı óńirler seısmıkalyq aımaqqa jatady
ASTANA. KAZINFORM — QR Tótenshe jaǵdaılar mınıstrligi resmı saýalymyzǵa joldaǵan jaýabynda Qazaqstandaǵy seısmıkalyq óńirler jóninde málimet berdi.
– «Seısmıkalyq aımaqtardaǵy qurylys» qaǵıdalar jınaǵyna sáıkes, Qazaqstannyń seısmıkalyq qaýipti óńirlerine Almaty, Jambyl, Túrkistan, Qyzylorda, Shyǵys Qazaqstan, Aqtóbe, Atyraý, Abaı, Jetisý jáne Ulytaý oblystary jatady. Sonymen qatar, seısmıkalyq qaýipti óńirler tizimine Almaty jáne Shymkent qalalary kiredi, – delingen habarlamada.
Mınıstrlik málimetinshe, seısmıkalyq qaýiptilik deńgeıi MSK-64 12 baldyq makroseısmıkalyq shkalasy boıynsha baǵalanady. Elimizdiń ońtústik-shyǵys óńirlerinde, ásirese Almaty qalasy men Almaty oblysynda seısmıkalyq qater eń joǵary dárejede.
– Onda tarıhı jer silkinisteriniń qarqyndylyǵy MSK-64 shkalasy boıynsha 8–10 balǵa deıin jetken, – delingen resmı jaýapta.
Sonymen birge, Tótenshe jaǵdaılar mınıstrliginen «Paıdaly qazbalardy óndirý aımaqty seısmıkalyq óńirge aınaldyrýy múmkin be?» – dep suraǵan edik.
– Taý-ken óndirisi seısmıkalyq qaýipke áser etýi múmkin, óıtkeni jarylys jumystary, taý jynystaryndaǵy kerneý jaǵdaıynyń ózgerýi jáne paıdaly qazbalardyń úlken kólemin óndirý jergilikti tehnogendik seısmıkalyq oqıǵalardy týdyra alady. Qazaqstanda paıdaly qazbalardy belsendi óndirý jáne jarylys jumystary jer qyrtysynyń jaı-kúıine áser etip, jergilikti tehnogendik seısmıkalyq belsendilikti týyndatýy múmkin aýmaqtar bar. Alaıda óńirdi tek paıdaly qazbalardy óndirý faktisine baılanysty resmı túrde seısmıkalyq dep tanýǵa bolmaıdy, ol arnaıy seısmologııalyq qadaǵalaýlardyń nátıjeleri negizinde aıqyndalady, – dep jaýap berdi TJM.
Aıta keteıik, buǵan deıin Almatydaǵy ǵımarattardyń qanshasy jer silkinisine tózimdi ekenin jazǵanbyz.
