Elimizde kásipkerlik bastaýda qandaı kedergiler bar
ASTANA. KAZINFORM — Bul suraq Jibek Joly arnasynyń «Búgin LIVE» baǵdarlamasynda talqylanyp, sala mamandary otandyq bıznestiń qazirgi ahýaly týraly oı bólisti.
Kásipker, memlekettik granttar boıynsha sarapshy Jansulý Ánýardyń aıtýynsha, Qazaqstanda bıznesti bastaý ońaı bolǵanymen, ony uzaq merzimde damytý qıyndyq týdyrady.
— Adamnyń kásipke qatysty bilimi bolý kerek. Emotsııaǵa, qııalǵa berilip bıznes ashýǵa bolmaıdy. Aldymen kásip ashýdyń jolyn meńgerip, memlekettik granttardyń qyr-syryn bilý qajet. Marketıngke ketetin shyǵyndy da esepteý kerek, — deıdi ol.
Resmı málimetke súıensek, jyl basynan beri 8 964 adam grant alyp, shaǵyn bıznesin ashqan. Onyń 5 539-y — aýyl turǵyndary. Jyl sońyna deıin barlyǵy 9 234 grant berý josparlanǵan. Bul rette kásipker, isker áıelder qaýymdastyǵynyń múshesi Aınur Bermaǵanbetova Qazaqstanda bıznesti qoldaý deńgeıi joǵary ekenin atap ótti.
— 12 jyl boıy balabaqsha bıznesimen aınalysyp kelemin. Ártúrli eldiń tájirıbesin kórdim. Qazaqstanda bızneske qoldaý óte kúshti. «Damý» baǵdarlamasymen tómen paıyzben nesıe aldym, «Atameken» palatasy da kóp kómektesti, — deıdi kásipker.
Onyń aıtýynsha, buryn bıznes-mentorlyq júıe bolmaǵandyqtan, kóptegen shaǵyn kásiptiń damýy tejelgen.
— Buryn bıznes-mentor degen túsinik bolǵan joq. Qazir bastaýysh kásipkerlerge múmkindik kóp. Myńdaǵan platforma bar. Ózim 100-ge jýyq jas kásipkerge baǵyt berdim, biraq olardyń jartysy ǵana kásipkerlikke bet burdy, — deıdi Bermaǵanbetova.
Sarapshy Jansulý Ánýar memlekettik grant alý joldaryn túsindirdi.
— Qazir jas kásipkerlerge qoldaý kóp. Jańa bıznes ashamyn degender Business.enbek.kz saıty arqyly ótinim bere alady. Granttar qaıtarymsyz, 400 AEK nemese 1,5 mln teńge kóleminde. 3 jyl kásipker statýsynda bolý, 20% qarjysynyń bolýy sııaqty talaptar bar. Eń bastysy, jeke bas múddesin emes, qoǵamǵa paıdaly isti kózdeý kerek, — deıdi ol.
Sonymen qatar kásipker bıznestegi negizgi qıyndyqtardy da atady.
— Adam ózi daıyn bolmasa, maqsaty anyq bolmasa, bıznes tez qurdymǵa ketedi. Alǵashqy 6 aıdan 1 jylǵa deıin shydaý kerek, sodan keıin ǵana nátıje kórinedi, — deıdi Jansulý Ánýar.
Al Aınur Bermaǵanbetova kásiptiń tez jabylý sebebin maman tapshylyǵymen jáne eńbekaqy máselesimen baılanystyrdy.
— Bul kadr máselesine, olardyń jalaqysyna qatysty. Kásipker komandany ózi basqarýy kerek. Óıtkeni bıznes dıstsıplınamen tikeleı baılanysty, — deıdi ol.
Aıta keteıik, endi elimizde bızneske nesıe berý protsesi tsıfrlandyrylady.