Elimizde kartop tapshylyǵy bola ma

ASTANA. KAZINFORM – Elimizde kartop boıynsha tapshylyq joq. Bul týraly QR Saýda jáne ıntegratsııa mınıstri  Arman Shaqqalıev málim etti.

- Qazir Aýyl sharýashylyǵy mınıstrligi otandyq kartop bar ekenin naqtylady. Keshe ǵana qosymsha tizimdi saýda oryndaryna joldadyq, ıaǵnı onda qolaıly baǵadaǵy 15 myń tonnaǵa tarta kartop bar ekeni atalyp ótti. Kólik shyǵyndaryn eskere otyryp, bul ónim dúken sórelerinde 240-280 teńge turýy kerek. Ekinshiden, ótken aptamen salystyrǵanda, búginde elimiz boıynsha ortasha eseppen 0,6 paıyzǵa arzandaǵanyn baıqadyq, - dedi A.Shaqqalıev Parlament Májilisinde tilshiler suraǵyna jaýap bere otyryp.

Onyń aıtýynsha, kartop boıynsha suranystyń kúrt artýyna nemese naryqta ónim tapshylyǵynyń paıda bolýyna eshbir alǵysharttar joq.

Eske salsaq, bıyl 11 aqpanda Aýyl sharýashylyǵy mınıstri Aıdarbek Saparov el óńirlerin kartoppen qamtamasyz etýge qatysty túsinik berdi.