Elimizde kartop eksporty jalǵasady, jumyrtqa ımporty ýaqytsha toqtaıdy
ASTANA. KAZINFORM — VAK sıyr etin eksporttaý, jumyrtqa ımporty jáne analyq mal basyn saqtaý týraly sheshim qabyldady, dep habarlaıdy Úkimettiń baspasóz qyzmeti.
Úkimette Premer-mınıstrdiń orynbasary — ulttyq ekonomıka mınıstri Serik Jumanǵarınniń tóraǵalyǵymen ótkizilgen syrtqy saýda jáne halyqaralyq ekonomıkalyq uıymdarǵa qatysý máseleleri jónindegi Vedomstvoaralyq komıssııanyń (VAK) otyrysynda elimizdiń azyq-túlik jáne ekonomıkalyq qaýipsizdigine áser etetin birqatar túıindi másele qaraldy.
Kartopty eksporttaýǵa tyıym salynbaıdy
Іshki naryqtaǵy baǵanyń aıtarlyqtaı turaqtanýyn jáne jetkilikti qor bar ekenin eskere otyryp, kartop eksportyna ýaqytsha shekteý engizýdiń jónsizdigi týraly sheshim qabyldandy.
Sıyr etin eksporttaýshylarǵa kvota berý talaby jeńildetiledi
Kvota bólýdiń qoldanystaǵy tetigi keminde 5 myń basqa arnalǵan jeke bordaqylaý alańy men óziniń et kombınatynyń bolýy sekildi birqatar talapty kózdeıdi. Sheshim qabyldaý kezinde VAK-qa qatysýshylar Úkimet bekitken Mal sharýashylyǵyn damytýdyń keshendi josparyn da nazarǵa aldy. Qujat iri qara mal sanyn 7,9 mln-nan 12 mln basqa arttyrýdy, sondaı-aq eksporttyq áleýetti nyǵaıtýdy jáne qazaqstandyq sıyr etin ótkizýdiń jańa naryǵyn ashýdy kózdeıdi. Aýyl sharýashylyǵy mınıstrligi kvota bólýdiń qoldanystaǵy erejesine tıisti ózgeris engizedi.
Sonymen qatar analyq mal basyn saqtaý jáne otandyq qaıta óńdeý kásiporyndaryn shıkizatpen qamtamasyz etý maqsatynda Qazaqstannan iri qara men usaq maldyń analyq basyn, sondaı-aq ІQM buqashyqtaryn, onyń ishinde EAEO-ǵa múshe memleketterge áketýge tyıym salýdy uzartý týraly sheshim qabyldandy.
Alty aıǵa deıin taýyq jumyrtqasyn EAEO elderinen ımporttaýǵa tyıym salynady
Qazirgi ýaqytta Qazaqstanda 70 qus fabrıkasy jumys isteıdi. Onyń 34-i jumyrtqa, 29-y et, 7-eýi asyl tuqym óndiredi. 2025 jyldyń qorytyndysy boıynsha taýyq jumyrtqasynyń óndirisi 2,4%-ǵa, 4 568,5 mln danaǵa artqan. Іshki naryqtaǵy otandyq óndiris 98%-dy qurady. Tıisti buıryqty Aýyl sharýashylyǵy mınıstrligi qabyldaıdy.
Sondaı-aq jıynda temir jol jyljymaly quramy men temir jol tóseminiń elementteri úshin quramdas bólikterdi úshinshi elderden ımporttaýǵa tyıym salýdy engizýdiń oryndylyǵy týraly másele qaraldy. Talqylaý barysynda otandyq jıyntyqtaýshy óndirýshilerdiń, lokomotıv óndirýshiler men tutynýshylardyń, onyń ishinde «QTJ» AQ-nyń ustanymdary tyńdaldy.
— Talqylaý qorytyndysy boıynsha ımportqa shekteýler engizýdiń orynsyz ekeni týraly sheshim qabyldandy. Sonymen qatar «Qazaqstan temir joly» AQ-ǵa temirjol jyljymaly quramyna arnalǵan qosalqy bólshekter men temirjol tósemi elementterin satyp alý kezinde otandyq óndirýshilerge basymdyq berýdi qamtamasyz etý tapsyryldy, — delingen habarlamada.
Budan buryn Aýyl sharýashylyǵy mınıstriniń orynbasary Erbol Tasjúrekov ortalyq kommýnıkatsııalar qyzmetinde ótken baspasóz máslıhatynda elde et jetkilikti bolǵanmen baǵa nege túspeı turǵanyn aıtty.