Elimizde qar barysynyń sany artty ma

ASTANA. KAZINFORM — Búgin Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń otyrysynda QR Ekologııa jáne tabıǵı resýrstar vıtse-mınıstri Nurken Shárbıev elde barys pen jolbarys sanyn qalpyna keltirý is-sharalaryna túsinik berdi.

— Barystyń sanyn qalpyna keltirý úshin de birqatar keshendi sharalar qolǵa alyndy. Negizgi mekendeý oryndarynda 3,6 mıllıon gektardy quraıtyn erekshe qorǵalatyn tabıǵı aýmaqtar quryldy. Barysty qorǵaý jáne baqylaý boıynsha júrgizilgen kúsh-jigerdiń arqasynda onyń sanyn 90-shy jyldardaǵy qaýipti deńgeıden (80-100 bas) eki eseden astamǵa arttyryp, shamamen 189-ǵa deıin jetkizdik, — dedi vıtse-mınıstr.

Budan bólek, jolbarystardyń sanyn qalpyna keltirý baǵdarlamasy aıasynda Іle-Balqash memlekettik tabıǵı qoryǵy (415 myń ga) quryldy.

— Jolbarystyń tabıǵı jemtik qoryn qalpyna keltirý úshin 2018-2024 jyldar aralyǵynda qoryqqa 205 bas buǵy ákelindi, 100-den astam qulan kóshirildi, elik pen qabannyń sany artty. 2024 jyldyń kúzinde eki jolbarys Nıderlandtan Іle-Balqash qoryǵynda ósirý úshin ákelindi. 2026 jyly Reseıden 3-4 jolbarys jetkizilmek, — dedi Nurken Shárbıev.

Budan buryn habarlanǵandaı, QR Parlamenti depýtattarynyń bastamashylyǵymen «Qazaqstan Respýblıkasynyń keıbir zańnamalyq aktilerine ańshylyq salasy jáne janýarlar dúnıesin saqtaý máseleleri boıynsha ózgerister men tolyqtyrýlar engizý týraly» zań jobasy Májiliske engizildi.