Elimizde qansha shetel azamaty eńbek etedi, basym bóligi qaı elderden keledi
ASTANA. KAZINFORM — 2025 jylǵy 1 jeltoqsandaǵy jaǵdaı boıynsha jergilikti atqarýshy organdardyń ruqsatymen Qazaqstan aýmaǵynda 14 103 shetel azamaty eńbek etedi.
Shetel jumys kúshin tartýǵa ruqsattardyń arasynda mynadaı sanattar bar: basshylar men olardyń orynbasarlary úshin 537 ruqsat (birinshi sanat), qurylymdyq bólimshelerdiń basshylary úshin 2 244 ruqsat (ekinshi sanat). Tartylǵan ShJK negizgi bóligi úshinshi (mamandar) jáne tórtinshi (bilikti jumysshylar) sanattarǵa jatady — tıisinshe olar 3 784 jáne 1 271 adam. Sondaı-aq maýsymdyq jumystarǵa 2 299 adam, al korporatıvtik aýystyrý aıasynda 3 970 adam tartyldy.
Qazirgi ýaqytta Qazaqstanda ShJK paıdalanatyn 1 817 jumys berýshi bar. Olarda 334,4 myńnan astam Qazaqstan azamaty jumys isteıdi, bul qyzmetkerlerdiń jalpy sanynyń 96%-y.
— Ekonomıkalyq qyzmet túrleri boıynsha eń kóp jumys isteıtinder: qurylys salasynda — 4 993 adam, aýyl, orman jáne balyq sharýashylyǵy — 2 316 adam, taý-ken ónerkásibi jáne karerlerdi qazý — 1 235 adam, óńdeý ónerkásibi — 1 155 adam.
Eńbek mıgranttary keletin negizgi elder: Qytaı — 5 604 adam, Ózbekstan — 2 110 adam, Túrkııa — 1 036 adam, Úndistan — 943 adam, — delingen Eńbekmıni taratqan habarlamada.
Іshki eńbek naryǵyn qorǵaý maqsatynda Eńbek jáne halyqty áleýmettik qorǵaý mınıstrligi jyl saıyn respýblıkaǵa shetel mamandaryn tartýǵa kvota belgileıtinin jáne bóletinin esterińizge salamyz. 2025 jyly jalpy kvota respýblıkadaǵy jumys kúshiniń sanyna qatysty 0,2% mólsherinde nemese 14,8 myń birlik bolyp belgilengen, al osy jyldyń naýryz aıynan bastap jergilikti atqarýshy organdardyń ótinimderine baılanysty mınıstrdiń buıryǵymen 16,5 myń birlikke deıin ulǵaıtyldy.
Aǵymdaǵy jyldyń tamyz aıynan bastap maýsymdyq sheteldik jumysshylardyń eńbek qyzmetin júzege asyrý úshin kásipter tizbesiniń keńeıýine baılanysty mınıstrdiń buıryǵymen jalpy kvota respýblıkadaǵy jumys kúshi sanyna qatysty 0,25% nemese 19,4 myń birlik mólsherinde belgilendi.
Búgingi tańda óńirlerdiń qajettiligin eskere otyryp, bul kvota 16,7 myńǵa deıin qysqartyldy.
Aıta ketelik Qostanaıdaǵy saýda ortalyǵynda 11 eńbek mıgranty qujatsyz jumys istegen.