Elimizde qansha salyq tóleýshi bar
ASTANA. KAZINFORM – Qazaqstanda kásipkerlik belsendilik artyp keledi. 2026 jylǵy 1 shildedegi jaǵdaı boıynsha salyq tóleýshiler sany 2 mln 939 myńǵa jetti.
Bul jyl basyndaǵy kórsetkishten 492 myńǵa kóp. Ózin-ózi jumyspen qamtý rejımin qoldanatyn adamdardyń sany da 688,6 myń adamǵa deıin ósti. Bul týraly Ulttyq ekonomıka mınıstrligi Kazinform agenttiginiń saýalyna bergen jaýabynda málimdedi.
– 2026 jylǵy 1 shildedegi jaǵdaı boıynsha salyq tóleýshiler sany 2 939 myń birlikke jetip, jyl basynan beri 492 myńǵa ulǵaıdy. Ózin-ózi jumyspen qamtý rejımin qoldanatyn adamdar sany 688,6 myń adamǵa deıin ósti. Bul halyqtyń ekonomıkalyq qyzmetke tartylýynyń keńeıip kele jatqanyn kórsetedi, – dep habarlady mınıstrlik.
Vedomstvonyń málimetinshe, 2026 jyly shaǵyn jáne orta bıznestiń eldiń jalpy ishki ónimindegi jalpy qosylǵan qun úlesi keminde 38% bolady dep boljanyp otyr. Al ózin-ózi jumyspen qamtyǵandardy esepke almaǵanda, ShOB salasynda jumyspen qamtylǵandar sany keminde 4 mln adamǵa jetedi dep kútiledi.
– Jalpy, aǵymdaǵy úrdister kásipkerlik belsendiliktiń oń dınamıkasynyń saqtalyp otyrǵanyn kórsetedi. Negizinen belsendi emes sýbektiler sanynyń qysqarýymen qatar jańa sýbektilerdiń, ózin-ózi jumyspen qamtyǵandardyń jáne ShOB-ty kredıtteý sanynyń ósýi bıznestiń qurylymdyq jańarý jáne qazirgi ekonomıkalyq jaǵdaılarǵa beıimdelý protsesin kórsetedi, – dep atap ótti Ulttyq ekonomıka mınıstrligi.
Mınıstrliktiń habarlaýynsha, kásipkerlik saıasatynyń tıimdiligin baǵalaý kezinde bir ǵana kórsetkishke súıený jetkiliksiz.
– 2026 jylǵy kásipkerlik saıasatynyń tıimdiligin baǵalaýda mınıstrlik biryńǵaı kórsetkishke emes, keshendi tásilge negizdeledi. Jańadan qurylǵan jáne turaqty jumys istep otyrǵan, ıaǵnı ómirsheń bıznestiń araqatynasy, turaqty jumys oryndarynyń ósýi, salyq túsimderiniń serpini jáne eńbek ónimdiligi negizgi nátıje ındıkatorlary retinde birlesip qarastyrylady, – dep túsindirdi vedomstvo.
Aıta keteıik, áleýmettik tólemder bank qosymshalary arqyly avtomatty túrde ustalady.
