Elimizde qansha nysan sý astynda qaldy

ASTANA. KAZINFORM – Elimizdiń sý basqan aýmaqtarynda quzyrly organdar táýlik boıy mindetterin oryndap jatyr. Búginde qutqarý jumystaryna 30 myń adam jáne 3 myń tehnıka jumyldyrylǵan.

Ortalyq kommýnıkatsııalar qyzmetinde ótken brıfıngide QR Tótenshe jaǵdaılar mınıstrligi Azamattyq qorǵanys jáne áskerı bólimder komıtetiniń aǵa ofıtseri Erasyl Saıpash sý tasqynynyń aǵymdaǵy jaǵdaıy týraly baıandady.

«Qutqarý jumystaryna 600-ge jýyq sý aıdaý qurylǵysy men sý kóligi, 16 ushaq tartyldy. Sý tasqyny bastalǵannan beri 98 myńnan astam adam qutqaryldy. Onyń 33 myńy – balalar. Ýaqytsha ornalastyrý ortalyqtarynda 7 myń adam jaıǵastyryldy. Onyń 3 364-i – balalar», - dedi ol.

Belgili bolǵandaı, Atyraý, Aqtóbe, Aqmola, Qostanaı, Soltústik Qazaqstan jáne Shyǵys Qazaqstan oblystarynda 3 497 jeke turǵyn úı, 489 aýla aýmaqtary, 1 778 saıajaı jáne 55 túrli maqsattaǵy ǵımarat sý astynda qalǵan.