Elimizde qansha kúnge jetetin janar-jaǵarmaı bar
ASTANA. KAZINFORM — 2023 jylmen salystyrǵanda janar-jaǵarmaı materıaldary naryǵyndaǵy jaǵdaı jaqsardy. Bul týraly Úkimet otyrysynda Energetıka mınıstri Almasadam Sátqalıev aıtty.
Mınıstrdiń dereginshe, munaı óńdeý zaýyttaryndaǵy, munaı bazalary men joldardaǵy dızel otynynyń jıyntyq qorlary 612 myń tonna nemese 38 kúnge, Aı-92 — 352 myń tonnany nemese 30 kúnge, Aı-95 — 86 myń tonna nemese 30 kúnge jetedi.
Qor janar-jaǵarmaı óndirýge jáne óńirlerden ótinimder berýine qaraı tolyqtyrylady.
Munaıdy qaıta óńdeý tereńdigi jáne jeńil munaı ónimderin óndirý 85-87 paıyzǵa deıin ulǵaıdy.
5 mamyrda Shymkent munaı óńdeý zaýytynda josparly kúrdeli jóndeý aıaqtaldy.
Zaýyt shtattyq rejımde jumys istep tur.
«Osylaısha, 2023 jylmen salystyrǵanda janar-jaǵarmaı materıaldary naryǵyndaǵy jaǵdaı jaqsardy», — dedi Almasadam Sátqalıev.
Onyń atap ótýinshe, keńeıtý esebinen munaı ónimderin óndirýdi ulǵaıtý boıynsha mynadaı jospar bar:
— Aqtaý bıtým zaýyty 1-1,5 mln tonnaǵa deıin;
— Shymkent munaı óndeý zaýyty 6-12 mln tonnaǵa deıin;
— Atyraý munaı óndeý zaýyty 5,5-6,7 mln tonnaǵa deıin;
— Pavlodar munaı-hımııa zaýyty 5,5-8 mln tonnaǵa deıin.
«Osy jobalardy iske asyrý ishki naryqtyń janar-jaǵarmaı materıaldarynyń ósip kele jatqan qajettiligin 100 paıyz qamtamasyz etýge, sondaı-aq munaı ónimderin kórshi elderge eksporttaýǵa múmkindik beredi», — dedi ol.
