Elimizde qansha kólemde elektr energııasy jetispeıdi
ASTANA. KAZINFORM — Qazaqstanda elektr qýatyn óndirý men tutyný arasyndaǵy alshaqtyq qysqaryp keledi. Bul jóninde QR Energetıka mınıstrligi resmı saýalymyzǵa joldaǵan jaýabynda málimdedi.
Mınıstrliktiń habarlaýynsha, 2025 jyly 123,1 mlrd kVt/saǵ elektr energııasy óndirildi. Onyń 8,6 mlrd kVt/saǵ jańartylatyn energııa kózderi obektileri arqyly alynǵan. Al qoldanylǵan elektr qýaty kólemi — 124,6 mlrd kVt/saǵ. Demek, byltyr 1,5 mlrd kVt/saǵ energııa syrttan ımporttalǵan.
— Elimizde elektr energııasyn óndirý men tutyný kólemi arasyndaǵy alshaqtyqty qysqartýdyń turaqty úrdisi baıqalady, bul ótken jyldarmen salystyrǵanda alshaqtyqtyń tómendegenin kórsetedi: 2023 jyly — 2,2 mlrd kVt/saǵ, 2024 jyly — 2 mlrd kVt/saǵ, 2025 jyly — 1,5 mlrd kVt/saǵ, — delingen habarlamada.
Sondaı-aq 2026 jyldyń 9 naýryzyndaǵy jaǵdaı boıynsha 25,8 mlrd kVt/saǵ elektr energııasy óndirilip, onyń 25,7 mlrd kVt/saǵ tutynylǵan.
Jalpy, elimizdiń ońtústik aımaqtarynda elektr qýaty jetispeýshiligi baıqalady. Mınıstrliktiń málimetinshe, Jambyl, Qyzylorda, Túrkistan, Jetisý oblystary, sondaı-aq Almaty jáne Shymkent qalalary energııa júıesiniń tapshylyǵyna neǵurlym beıim. Óıtkeni, energııa kózderiniń basym bóligi soltústik jáne batys oblystarda.
— Ońtústik aımaqta elektr energııasynyń jetispeýshiligi soltústik aımaqtan jetkizý arqyly qamtamasyz etiledi, — delingen resmı jaýapta.
Aıta keteıik, buǵan deıin bıýdjettik uıym nysandaryna kún panelderinen elektr energııasyn alý múmkindigi beriletinin jazǵanbyz.