Elimizde qansha er adam bala kútimine oraı demalysqa shyqqan
ASTANA. KAZINFORM – 2024 jyldyń birinshi jartyjyldyǵynda 561,5 myń qazaqstandyq Memlekettik áleýmettik saqtandyrý qorynan áleýmettik tólem alǵan.
Onyń ishinde 560,3 myń áıel jáne 1,2 myń er adam bar. Bala kútimine baılanysty demalysqa shyqqan er adamdar negizinen aktsıonerlik qoǵam, jaýapkershiligi shekteýli seriktestiginde jumys isteıdi nemese ekonomıkanyń ártúrli salasynda jeke kásipkerlikpen aınalysady. Tolyǵyraq Memlekettik áleýmettik saqtandyrý qory AQ-nyń agenttik joldaǵan resmı saýal jaýabynda aıtylǵan.
Byltyr bala kútimine oraı 575,7 myń adam áleýmettik tólem alǵan, onyń ishinde 574 myń (99,7%) áıel jáne 1,7 myń (0,3%) er adam bar.
Qordyń statıstıkalyq málimetterine súıensek, jyl sońyna deıin bala kútimi boıynsha áleýmettik tólem alýshylardyń sany ótken jylmen salystyrǵanda kóp bolýy múmkin.
2024 jyldyń birinshi jartyjyldyǵynda dekretke shyqqan qazaqstandyqtar 500 mln teńge alǵan.
«2023 jyly áleýmettik tólemderdiń jalpy somasy 287 mlrd teńgeni qurady, onyń ishinde áıelderge — 286 mlrd teńge jáne erlerge — 1 mlrd teńge. 2024 jyldyń birinshi jartyjyldyǵynda — 193 mlrd teńge, onyń ishinde áıelderge — 192,5 mlrd teńge jáne erlerge -500 mln teńge berildi. Qordan tólenetin áleýmettik tólem mólsheri bala dúnıege kelmes buryn 24 aıda qorǵa áleýmettik aýdarymdar júrgizilgen ortasha aılyq tabystyń 40% quraıdy», - delingen resmı saýal jaýabynda.
Qordan bólinetin áleýmettik tólem memlekettik organdar men uıymdardyń aqparattyq júıelerinen alynǵan málimetter negizinde taǵaıyndalady. Negizgi qujat balanyń týý týraly kýáligi jáne ótinish berýshiniń JSN boıynsha qorǵa túsken áleýmettik aýdarymdar týraly málimetter. Áleýmettik tólemderdi alýshy er adamdar AQ-da, JShS-de jumys isteıdi nemese ekonomıkanyń túrli salalarynda jeke kásipkerler.
Sondaı-aq, eger 1,5 jasqa deıin bala kútimine oraı demalysqa shyqqan ata-ananyń biri júıeniń qatysýshysy bolmasa, ol jaǵdaıda bala bir jarym jasqa tolǵanǵa deıin, bıýdjet qarajaty esebinen aı saıynǵy memlekettik járdemaqy taǵaıyndalady:
- birinshi balaǵa - 5,76 aılyq eseptik kórsetkish (AEK);
- ekinshi balaǵa-6,81 AEK;
- úshinshi balaǵa-7,85 AEK;
- tórtinshi jáne odan da kóp balaǵa-8,90 AEK.
Áleýmettik tólem nemese járdemaqy ákesine nemese anasyna ǵana taǵaıyndalady. Eki jáne odan da kóp balaǵa áleýmettik tólem nemese járdemaqy ár balaǵa jeke taǵaıyndalady.
