Elimizde qansha adam zııandy eńbek jaǵdaılarynda jumys isteıdi
ASTANA. KAZINFORM — Ulttyq statıstıka bıýrosy 2025 jyly zııandy jáne ózge de qolaısyz eńbek jaǵdaılarynda jumys istegen qyzmetkerler sanyn naqtylady.
— 2025 jyly zııandy jáne ózge de qolaısyz eńbek jaǵdaılarynda jumys istegen qyzmetkerlerdiń naqty sany 396,5 myń adamdy qurady, bul zerttelgen kásiporyndardaǵy barlyq qyzmetkerdiń (1,7 mln-nan) — 22,2%. Zııandy eńbek jaǵdaılarynda jumys isteıtin áıelderdiń naqty sany 80,4 myń adam boldy, — delingen vedomstvo keltirgen aqparatta.
Zııandy eńbek jaǵdaılarynda jumys isteıtinderdiń eń kóp sany ónerkásip salasynda tirkeldi — 272,7 myń adam. Onyń ishinde óńdeý ónerkásibinde 115 myń adam, taý-ken óndirý jáne karerlerdi ıgerý salasynda 114,7 myń adam jumys isteıdi.
Zııandy eńbek jaǵdaılarynda jumyspen qamtylǵandardyń eń joǵary kórsetkishi Qaraǵandy oblysynda — 56,3 myń adam, Mańǵystaý oblysynda — 37,2 myń adam, Pavlodar oblysynda — 49,2 myń adam, Shyǵys Qazaqstan oblysynda — 25,1 myń adam jáne Almaty qalasynda — 24,5 myń adam tirkeldi. Eń tómen kórsetkish Almaty oblysynda — 4,1 myń adam.
2025 jyly menshik nysanyna qaramastan kásiporyndardyń eńbek qaýipsizdigi men eńbekti qorǵaýǵa jumsaǵan shyǵyndary 558,1 mlrd teńgeni qurady.
Osydan buryn zııandy eńbek jaǵdaıynda jumys isteıtin 8,7 myń adamǵa áleýmettik tólem jasalǵanyn jazǵanbyz.
