Elimizde qansha adam tabıǵı gaz tutynyp otyr

ASTANA. KAZINFORM - Búginde elde shamamen 13 mln adam tabıǵı gazǵa qol jetkizgen. 2026 jyldyń qorytyndysy boıynsha gazdandyrý deńgeıi 64,3%-ǵa jetkizý josparlanyp otyr, bul ótken jylǵy kórsetkishten (62,4%) joǵary.

QR Energetıka mınıstrligi baspasóz qyzmetiniń habarlaýynsha, bıyl elimizde gazdandyrý boıynsha 40 joba iske asyrylyp jatyr. Nátıjesinde 10 eldi mekende 32 myńnan astam turǵyn tabıǵı gazǵa qol jetkizedi.

Jobalar Aqtóbe, Batys Qazaqstan, Jambyl, Qaraǵandy, Qostanaı, Qyzylorda, Mańǵystaý jáne Túrkistan oblystaryn, sondaı-aq Ulytaý jáne Jetisý oblystaryn qamtyp otyr.

Sonymen qatar «Beıneý – Bozoı – Shymkent» magıstraldyq gaz qubyrynyń ekinshi jelisiniń birinshi kezeńiniń qurylysy júrip jatyr. Bıyl jyl sońyna deıin jylyna 10 mlrd tekshe metr gaz ótkizý qýatymen gaz qubyrynyń jelilik bóliginiń qurylysyn aıaqtaý josparlanǵan.

Osyǵan deıin elimizdiń tabıǵı gaz áleýetin arttyrý úshin qandaı jumystar atqarylyp jatqany jóninde jazdyq.