Elimizde qandaı dástúrli medıtsınaǵa ruqsat berilgen

ASTANA. KAZINFORM — Premer-mınıstr Oljas Bektenov Senat depýtattarynyń saýalyna oraı elimizde qandaı dástúrli medıtsınaǵa ruqsat berilgen aıtty. 

— Dúnıejúzilik densaýlyq saqtaý uıymynyń usynymyna sáıkes dástúrli (halyqtyq) medıtsına tásilderin dıagnostıka, emdeý jáne profılaktıka úshin qosymsha tıisti ruqsaty bar medıtsına qyzmetkerleriniń ǵana paıdalanýyna bolady. Búginde elimizde tek dáleldi jáne dástúrli medıtsına ádisterin qoldanýǵa ruqsat etilgen. Qoldanystaǵy zańnamaǵa sáıkes dástúrli medıtsınanyń birneshe túrine (gomeopatııa, refleksoterapııa, fıtoterapııa, manýaldyq terapııa, gırýdoterapııa, sý-djok terapııa) ruqsat berilgen, — dedi Úkimet basshysy jaýabynda.

Onyń atap ótýinshe, medıtsınalyq qyzmettiń osy túrlerin júzege asyrý úshin memlekettik lıtsenzııa men maman sertıfıkaty qajet.

— Joǵaryda atalǵan medıtsına túrlerine jatpaıtyn emdeý ádisteri zańsyz kásipkerlik nemese medıtsınalyq qyzmet sanalady. Zańsyz medıtsınalyq qyzmet kórsetken jaǵdaıda ákimshilik jáne qylmystyq jaýapkershilik qarastyrylǵan, — dedi premer-mınıstr.

Oljas Bektenovtiń jaýabyna berilgen anyqtamaǵa sáıkes, medıtsınalyq qyzmetti lıtsenzııalaý rásimi 2015 jyldan bastap avtomattandyrylǵan jáne «E-License» portaly arqyly kórsetiledi. Portalda «ruqsat berý qujatyn izdeý» qosymsha betinen árbir azamat (mamannyń JSN, BSN derekteri boıynsha) mamannyń jáne dástúrli medıtsınalyq ortalyqtardyń ruqsat berý qujatynyń bar-joǵyn kórýge múmkindigi bar.

Aıta keteıik, Garvard jáne Stenford ýnıversıtetteri ǵalymdarynyń birlesken zertteýine sáıkes, jasandy ıntellekt adamdarǵa qaraǵanda dálirek dıagnoz qoıa alady.