Elimizde qandaı azyq-túlik ónimderiniń baǵasy tómendedi
ASTANA. KAZINFORM – 26 tamyzdaǵy jaǵdaı boıynsha, esepti apta ishinde Qazaqstanda áleýmettik mańyzy bar azyq-túlik taýarlarynyń birqatary boıynsha baǵanyń tómendegeni baıqaldy. Bul týraly Ulttyq statıstıka bıýrosy jarııalady.
Apta ishinde pııazdyń baǵasy 4,8%, aq qaýdandy qyryqqabattyń baǵasy 4,6%, kartop 2,9%, sábiz 2,4%, almanyń baǵasy 1,1%-ǵa tómendedi.
Óńirler bólinisinde elimizdiń birqatar qalasynda deflıatsııalyq dınamıka baıqaldy. Áleýmettik mańyzy bar azyq-túlik taýarlarynyń jalpy baǵa deńgeıi bir apta ishinde Qonaev qalasynda 0,4%-ǵa, Atyraý, Jezqazǵan jáne Kókshetaý qalalarynda 0,2%-ǵa, Almaty, Qyzylorda, Oral jáne Óskemen qalalarynda 0,1%-ǵa tómendedi. Qostanaı, Aqtóbe, Petropavl, Taraz, Taldyqorǵan jáne Túrkistan qalalarynda baǵalar ótken apta deńgeıinde saqtaldy.
Respýblıka boıynsha pııazdyń ortasha baǵasy 1 kelisine 179 teńge. Eń tómen baǵa Túrkistan qalasynda – 1 kelisi 135 teńge deńgeıinde tirkeldi.
Aq qaýdandy qyryqqabattyń respýblıka boıynsha ortasha baǵasy 1 kelisi 176 teńge. Eń tómen baǵa Taraz qalasynda – 132 teńge.
Respýblıka boıynsha kartoptyń ortasha baǵasy kelisine 241 teńge. Eń qoljetimdi baǵalar Pavlodar qalasynda – 177 teńge, Qostanaı qalasynda – 194 teńge deńgeıinde tirkeldi.
Qyzanaqtyń ortasha respýblıkalyq baǵasy 1 kelisi 546 teńge. Eń qoljetimdi baǵa Taraz qalasynda – 315 teńge deńgeıinde qalyptasty.
Áleýmettik mańyzy bar azyq-túlik taýarlary baǵalary ındeksiniń kórsetkishi apta saıyn esepteledi. Baǵalardy baqylaý barlyq oblys ortalyqtarynda, respýblıkalyq mańyzy bar qalalarda jáne astanada júrgiziledi. Áleýmettik mańyzy bar azyq-túlik taýarlary baǵasynyń dınamıkadaǵy ózgeristerin Qazaqstan Respýblıkasy Strategııalyq josparlaý jáne reformalar agenttigi Ulttyq statıstıka bıýrosynyń saıtynan jáne «Taldaý» aqparattyq-taldaý júıesinen kórýge bolady.
Áleýmettik mańyzy bar azyq-túlik taýarlarynyń tizbesi Qazaqstan Respýblıkasy Saýda jáne ıntegratsııa mınıstriniń 2025 jylǵy 23 jeltoqsandaǵy №362-NQ buıryǵymen bekitilgen jáne 31 ataýdaǵy azyq-túlik ónimderin qamtıdy.
Aıta keteıik, Qazaqstan Eýrazııanyń azyq-túlik habyna aınalyp keledi.
