Elimizde qandaı áleýmettik mańyzy bar taýarlardyń baǵasy tómendedi
ASTANA.KAZINFORM — 24 maýsymdaǵy jaǵdaı boıynsha esepti aptada Qazaqstanda áleýmettik mańyzy bar azyq-túlik taýarlarynyń birqatarynyń baǵasy tómendedi. Bul týraly Ulttyq statıstıka bıýrosy málim etti.
Eń kóp arzandaǵan ónim – qyzanaq, onyń baǵasy 5,5% tómendedi. Sondaı-aq І sanattaǵy jumyrtqa (-1,3%), qııar (-1,3%), pasterlengen sút (-0,2%), maılylyǵy 2-3% aıran (-0,2%), maılylyǵy 5-9% súzbe (-0,2%), qara shaı (-0,2%), sondaı-aq ajarlanǵan kúrish jáne balǵyn, salqyndatylǵan jáne muzdatylǵan balyq, qaımaq, alma jáne as tuzynyń baǵasy (árqaısysy -0,1%) tómendedi.
Óńirler bólinisinde deflıatsııalyq úrdis elimizdiń birqatar qalalarynda baıqaldy. Bir apta ishinde áleýmettik mańyzy bar azyq-túlik taýarlarynyń jalpy baǵa deńgeıi Qonaevta (-0,5%), Kókshetaýda (-0,4%), Pavlodarda (-0,3%), Shymkentte, Atyraýda jáne Petropavlda (árqaısysy -0,2%) tómendedi. Al Qostanaı, Qyzylorda, Semeı, Taraz jáne Óskemen qalalarynda baǵalar ótken apta deńgeıinde saqtaldy.
Óńirlerdegi baǵanyń tómendeýine kókónis ónimderiniń maýsymdyq arzandaýy, sondaı-aq bakaleıa tobyna jatatyn jekelegen taýarlar baǵasynyń tómendeýi negizgi faktor boldy.
Respýblıka boıynsha qyzanaqtyń ortasha baǵasy bir kılogramyna 654 teńgeni qurady. Eń tómengi baǵa Shymkent qalasynda tirkelip, bir kılogramy 406 teńgeni qurady.
Ajarlanǵan kúrishtiń ortasha respýblıkalyq baǵasy bir kılogramyna 532 teńge boldy. Eń qoljetimdi baǵalar Qyzylordada – 461 teńge jáne Almatyda – 478 teńge deńgeıinde tirkeldi.
Kartoptyń respýblıka boıynsha ortasha baǵasy bir kılogramyna 280 teńgeni qurady. Eń tómengi baǵa Taraz qalasynda tirkelip, bir kılogramy 220 teńge boldy.
І sanattaǵy on dana jumyrtqanyń ortasha baǵasy respýblıka boıynsha 575 teńgeni qurady. Eń tómengi baǵalar Kókshetaýda (486 teńge) jáne Aqtóbede (488 teńge) tirkeldi.
Et ónimderi boıynsha respýblıkadaǵy súıekti sıyr etiniń ortasha baǵasy bir kılogramyna 3 777 teńgeni, taýyq etiniń ortasha baǵasy bir kılogramyna 1 725 teńgeni qurady.
Aıta keteıik, SQO-da azyq-túlik baǵasyn negizsiz ósirýdiń 50 deregi anyqtalǵan bolatyn.
