Elimizde qaldyqtardy óńdeý ortalyǵy qurylady

ASTANA. KAZINFORM – Qazaqstanda qoqys ekonomıkalyq resýrs retinde qarastyrylady. Bul týraly «Jibek Joly» radıosynyń «V kontekste» qoǵamdyq-saıası baǵdarlamasynda «Jasyl damý» AQ basqarýshy dırektory Danııar Baıǵaraev málimdedi.

Onyń aıtýynsha, eldegi reforma alǵash ret mundaı aýqymda júzege asyrylyp jatyr jáne ol «Taza Qazaqstan» baǵdarlamasyna negizdelgen.

– Baǵdarlama negizinde qaldyqtardyń barlyq túrin basqarý jónindegi tujyrymdama ázirlendi. Ony Qazaqstannan jáne shetelden kelgen shamamen 120 sarapshy daıyndady, – dedi ol.

Atalǵan qujat eldegi qaldyqtardy retteýge qatysty aýqymdy zańnamalyq ózgeristerdiń negizine aınalyp otyr. Endi barlyq sala úshin biryńǵaı ereje engiziledi.

– Kommýnaldyq, qurylys, medıtsınalyq jáne ónerkásiptik qaldyqtarǵa arnalǵan biryńǵaı erejelerdi qalyptastyryp jatyrmyz, – dep túsindirdi Danııar Baıǵaraev.

Salada tsıfrlandyrýǵa erekshe kóńil bólinip otyr. Bul baǵyttaǵy basty maqsat – barlyq protsesti tolyq ashyq ári baqylaýǵa bolatyn júıege kóshirý.

Sondaı-aq biryńǵaı úılestirýshi organ retinde «Jasyl damý» AQ bekitiledi.

– «Jasyl damý» negizinde elimizde qaldyqtardy óńdeý ortalyǵyn qurý josparlanyp otyr. Oǵan ulttyq mártebe beriledi. Búkil el boıynsha qaldyqtardy basqarý júıesin úılestiretin, barlyq protsesti birtutas mehanızmge biriktiretin organ bolmaq. Uıymnyń 2026-2030 jyldarǵa arnalǵan arnaıy tujyrymdamasy da bekitilgen, – dedi ol.

Reformanyń taǵy bir mańyzdy baǵyttarynyń biri – qaldyq naryǵyn qalyptastyrý. ıAǵnı qaldyqtardy tek joıýǵa arnalǵan materıal emes, aınalymǵa túsetin ekonomıkalyq resýrsqa aınaldyrý kózdeledi.

– Bizdiń maqsatymyz – qaıta óńdeý úderisi bızneske bastaıtyndaı tolyqqandy naryq qurý, – dedi spıker.

Sarapshy qaldyqtar eki negizgi sanatqa bólinetinin alǵa tartty. Olar – ekonomıkalyq turǵydan qundy jáne paıdasyz qaldyqtar. Bul jikteý qaıta óńdeý júıesin tıimdi uıymdastyrýǵa múmkindik beredi.

– Metall, shyny, plastık jáne ónerkásiptik qaldyqtardyń bir bóligi qundy shıkizatqa jatady, al medıtsınalyq jáne keıbir qurylys qaldyqtary kádege jaratýǵa jatady, – dep tolyqtyrdy ol.

Sondaı-aq maman eldegi shamamen 300 mıllıon tonnaǵa jetetin kúl-qoqys qaldyqtarynyń úlken ekonomıkalyq áleýeti bar ekenin atap ótti.

– Kúldiń 80 paıyzyn qurylys salasynda paıdalanýǵa bolady, al onyń quny tonnasyna júzdegen myń teńgege jetedi, – dep atap ótti spıker.

Sonymen birge Qazaqstanda ınfraqurylym tapshylyǵy saqtalyp otyr. Polıgondar men qaıta óńdeý kásiporyndarynyń jetispeýshiligi keı óńirlerde stıhııalyq qoqys úıindileriniń paıda bolýyna sebep.

Máseleni sheshý úshin aldymen bazalyq ınfraqurylym qalyptastyrý kózdelip otyr, sodan keıin ǵana qaıta óńdeý kólemin arttyrý kezeńi bastalady.

– Aldymen bazalyq qajettilikterdi jabamyz. Sodan keıin kómý kólemin qysqartýǵa kóshý josparda, – dep túsindirdi ol.

Sondaı-aq aýyldyq aımaqtardy qamtıtyn jeńildetilgen qarjylandyrý baǵdarlamasy ázirlenip jatyr.

– Biz ákimdikterge tehnıka, tsıfrlyq júıeler men polıgondar qurý úshin qaıtarymdy qarjylandyrý berýdi josparlap otyrmyz, – dep atap ótti ol.

Aıta keteıik, jaqynda elordada ótetin Óńirlik ekologııalyq sammıtinde Astana deklaratsııasy qabyldanady.