Elimizde qaldyqtardy qaıta óńdeýdi damytýǵa 122 mlrd teńgeden astam qarjy bólindi
ASTANA. KAZINFORM — QR Ekologııa jáne tabıǵı resýrstar mınıstrliginiń qoldaýymen «Jasyl damý» AQ qaldyqtardy basqarýdyń zamanaýı ınfraqurylymyn damytýǵa arnalǵan 34 jobany qarjylandyrýǵa kádege jaratý tólemderi esebinen 122,6 mlrd teńge bóldi. Jobalar jańa qaıta óńdeý óndiristerin salýdy, suryptaý keshenderin qurýdy jáne arnaıy tehnıka satyp alýdy kózdeıdi.
QR Ekologııa jáne tabıǵı resýrstar mınıstrligi janyndaǵy Investıtsııalyq shtab jalpy qarjylandyrý kólemi 440 mlrd teńge bolatyn 67 jobany maquldady. Onyń ishinde 34 joba qarjylandyryldy.
Qarjylandyrylǵan jobalardyń 6-ýy jyldyq jalpy qýaty 650 myń tonna qatty turmystyq qaldyqtardy suryptaý nysandaryn qurýdy kózdeıdi. Taǵy 18 joba jylyna 435 myń tonna qaldyqty qaıta óńdeý qýattaryn damytýǵa baǵyttalǵan. Sonymen qatar 10 joba aıasynda 177 birlik arnaıy tehnıka satyp alý qarastyrylǵan.
Búginde 15 joba paıdalanýǵa berildi. Olardyń aıasynda 131 birlik arnaıy tehnıka satyp alynyp, jyldyq jalpy qýaty 290 myń tonna bolatyn suryptaý jelileri iske qosyldy. Sondaı-aq jylyna 19,3 myń tonna qaldyqty qaıta óńdeýge múmkindik beretin óndiristik qýattar paıdalanýǵa berildi.
Qarjylandyrýdyń eń kóp kólemi Almaty qalasyndaǵy, Soltústik Qazaqstan, Pavlodar, Aqtóbe jáne Qostanaı oblystaryndaǵy jobalarǵa baǵyttalǵan. Sonymen qatar jobalar Atyraý, Aqmola, Mańǵystaý, Shyǵys Qazaqstan oblystarynda, Abaı oblysynda, Astana men Shymkent qalalarynda jáne elimizdiń basqa da óńirlerinde júzege asyrylyp jatyr.
Jobalar salanyń negizgi baǵyttaryn qamtıdy. Olardyń qatarynda makýlatýrany, PET-bótelkelerdi, avtokólik shınalaryn jáne basqa da qaldyq túrlerin qaıta óńdeý, jumys istep turǵan kásiporyndardy jańǵyrtý, sondaı-aq arnaıy tehnıka parkin jańartý bar.
Mınıstrlik jańa jobalardy iske asyrý jumystary jalǵasyp jatqanyn habarlady. Qazirgi ýaqytta birqatar bastama belgilengen rásimderge sáıkes qaraý, kelisý jáne qarjylandyrýǵa daıyndaý kezeńderinen ótip jatyr.
Eske sala keteıik, kádege jaratý tólemderi qarajatyn baǵyttaý QR Ekologııalyq kodeksine sáıkes júzege asyrylady. Mundaı jobalardy iske asyrý qaldyqtardy basqarýdyń zamanaýı ınfraqurylymyn damytýǵa, qaıta óńdeý kólemin arttyrýǵa, kómýge jiberiletin qaldyqtar kólemin azaıtýǵa jáne qaıtalama shıkizatty ekonomıkalyq aınalymǵa tartýǵa yqpal etedi.
Qazaqstanda lıtıı-ıondy batareıalar keńinen qoldanyla bastady. Smartfondardan bastap elektromobılder men energııa saqtaý júıeleriniń basym deni osy tehnologııa kómegimen jumys istep tur. Alaıda eski batareıalardy qaıda jiberemiz, memleket mundaı qaldyqtardyń kólemin qalaı baqylamaq? Máseleni Kazinform tilshisi saraptap kórdi.
