Elimizde Italııanyń birneshe ýnıversıtetiniń fılıaly ashylýy múmkin

ASTANA. KAZINFORM — Taldyqorǵanda Italııanyń Marke polıtehnıkalyq ýnıversıtetiniń fılıaly ashylady. Bul týraly Aqordada Ǵylym jáne joǵary bilim mınıstri Saıasat Nurbek aıtty.

— Ol tolyqqandy kampýs, qazirdiń ózinde ǵımaratyn, baǵdarlamasyn ázirlep qoıdyq. Onda Italııadan kelgen oqytýshylar da jumys isteıdi. Aıta keterligi, olarǵa óńir, tabıǵaty unady, — dedi mınıstr.

Onyń atap ótýinshe, munan bólek Ǵylym mınıstrligi Italııanyń taǵy 2 jetekshi ýnıversıtetimen kelissóz júrgizip jatyr.

— Olar: La Sapıentsa Rım memlekettik ýnıversıteti men Italııadaǵy jetekshi tehnologııalyq joǵary oqý oryndarynyń biri — Mılan polıtehnıkalyq ýnıversıteti. Sonymen qatar Týrın polıtehnıkalyq ýnıversıtetimen de aldyn ala ýaǵdalastyq bolǵan edi. Týrın — avtomobıl jasaý jáne ónerkásiptik dızaın elordasy. Kelesi jyly-aq jaqsy jańalyqpen qýantamyz dep úmittenemin, — dedi Saıasat Nurbek.

Sonymen qatar mınıstr qyrkúıekte Italııa Prezıdentiniń Qazaqstanǵa sapary josparlanǵanyn, onyń aıasynda jańa kelisimder jarııa etiletindigin aıtty.

Eske sala ketsek, sońǵy 3 jyldyń ishinde elimizde eń myqty 38 sheteldik ýnıversıtettiń fılıaly ashyldy.