Elimizde ıt-mysyq aýlaý qyzmeti jergilikti ákimdikterge beriledi

AQTÓBE. KAZINFORM — Aqtóbede byltyr 26 myńnan astam buralqy ıt-mysyq aýlandy. Qańtardyń 18-nen bastap bul jumysty jergilikti ákimdikter atqarady.

Qazaqstanda «Janýarlarǵa jaýapkershilikpen qaraý týraly» Zańynyń 15-babyna taǵy da ózgertýler men tolyqtyrýlar engizildi. Endi buralqy ıt-mysyqty aýlaý, olardy jansyzdandyrý, joıý jumystary jergilikti ákimdikterdiń mindeti.

— 2025 jyldyń maýsym aıynda Zańǵa ózgertýler men tolyqtyrýlar engizilip, bıyl qańtar aıynyń 18-inen bastap kúshine enedi. Zańǵa sáıkes bul jumys jergilikti atqarýshy bılikke júkteledi, ıaǵnı qala, aýdan, aýyldyq okrýg ákimderi jaýapty bolady. Buralqy ıt-mysyqty aýlaý, olardy ornalastyrý, tańbalaý jumystarynyń bári ákimdikke júkteledi, — dedi Aqtóbe oblystyq veterınarııa basqarmasynyń basshysy Aıbek

Byltyr jyl ishinde Aqtóbe oblysynda 26 220 buralqy ıt, 500 mysyq aýlandy. Ýaqytsha kútip ustaý pýnktine 2700 buralqy ıt jáne 500 mysyq jetkizildi. Barlyǵy 3 myńnan astam buralqy ıt, mysyqqa sterıldeý jasaldy, ekpe salynyp, tańbalandy. Tańba júıesine engizilip, meken etken jerine qaıta jiberildi.

Eske salsaq, byltyr Aqtóbede 100 mln teńge bólindi. Al 2024 jyly odan eki ese kóp qarjy bólingenimen, basqarmada buralqy ıt-mysyqty ustaıtyn oryn bolmaı, bar jumysty jeke kásipker atqardy.