Elimizde ınvestorlardyń qyzyǵýshylyǵyn arttyratyn salalar kóp - Toqaev

ASTANA. KAZINFORM – Sırek kezdesetin metaldar, tsıfrlyq ınfraqurylym, jańartylatyn energııa kózderi salalaryna basa mán bergen jón. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev málim etti.

- Inflıatsııa deńgeıi turaqtalyp, tómendegennen keıin naryq qaǵıdattaryn kúsheıtý kerek bolady. Damý ınstıtýttary bıznespen jáne qarjy sektorymen tıimdi qarym-qatynas ornatýy qajet. Bul qatynas básekelestikke emes, ózara seriktestikke negizdelýi kerek. Elimizde ınvestorlardyń qyzyǵýshylyǵyn arttyratyn salalar kóp. Osy salalardy damytý úshin memleket pen bıznes arasynda syndarly yntymaqtastyq bolýǵa tıis. Ásirese, sırek kezdesetin metaldar, munaı-gaz hımııasy, tsıfrlyq ınfraqurylym, jańartylatyn energııa kózderi, kólik jáne agroóńdeý salalaryna basa mán bergen jón, - dedi Qasym-Jomart Toqaev.

Prezıdenttiń aıtýynsha, qazir tehnologııalar qarqyndy damyp jatqan kezde asa qajetti materıaldarǵa, ıaǵnı, sırek metaldarǵa suranys kúrt artyp keledi.

- Qazaqstanda mundaı jobalardy júzege asyrýǵa Batys elderi jáne basqa da damyǵan memleketterdiń ınvestorlary zor qyzyǵýshylyq tanytyp otyr. Bul – Qazaqstannyń jahandyq básekedegi artyqshylyǵy. Osy artyqshylyqty tıimdi paıdalanýymyz kerek, ony el ıgiligine jaratý qajet, - dedi Memleket basshysy.

Budan buryn habarlanǵandaı, Prezıdent Ata Zańymyzǵa qatysty túpkilikti sheshim jalpyulttyq referendýmda qabyldanatynyn málim etti.