Elimizde ınvestorlar quqyǵyn qorǵaıtyn «prokýrorlyq súzgi» mehanızmi engizildi
ASTANA. KAZINFORM — Qazaqstanda ınvestorlar quqyǵyn qorǵaýǵa arnalǵan arnaıy «prokýrorlyq súzgi» mehanızmi iske qosyldy, dep habarlaıdy Aqordanyń baspasóz qyzmeti.
Bıyldan bastap memlekettik organdar Bas prokýratýranyń aldyn ala kelisiminsiz ınvestorlarǵa qatysty tekserý júrgizýge, ákimshilik is qozǵaýǵa, talap aryz berýge nemese qandaı da bir shekteý qoıýǵa quqyly emes.
— Biz Ulttyq tsıfrlyq ınvestıtsııalyq platformany iske qostyq. Ol ınvestıtsııalarǵa qatysty memlekettik qyzmetterdi «bir tereze» qaǵıdaty boıynsha biriktirip, keńes berýden bastap ruqsat alýǵa deıingi barlyq úderisti qamtıdy. Budan bólek, iskerlik belsendilikti yntalandyrý jáne ekonomıkaǵa jeke ınvestıtsııa tartý úshin jańa Salyq kodeksi Senat qaraýyna engizildi. Qujat jergilikti óndiristi damytatyn ınvestorlarǵa maqsatty jeńildikter berýdi jáne qosylǵan quny joǵary ónim eksporttaýshylardy qoldaýdy qarastyrady, — dedi Prezıdent.
Memleket basshysy ınvestorlarmen yqpaldastyqtyń perspektıvaly baǵyttaryna, atap aıtqanda, Qazaqstannyń ındýstrııalyq áleýetin damytý máselesine toqtaldy.
— Taý-ken salasy — elimizdiń óńdeý ónerkásibiniń negizgi tiregi bolyp qala beredi. Qazaqstan taý-ken ónerkásibi men metallýrgııanyń jahandyq mańyzyn túsine otyryp, ınvestorlarǵa ashyq, jan-jaqty zańnama arqyly turaqty ári qolaıly ıýrısdıktsııa qalyptastyrdy. Júrgizilip jatqan reformalardyń nátıjesinde elimizdegi geologııalyq barlaý jumystaryna álemdik iri oıynshylar — Rio Tinto, Fortescue, Ivanhoe, First Quantum jáne Tech Resources kompanııalary keldi. Jańa Salyq kodeksinde shıkizatty el ishinde tereń óńdeýdi yntalandyratyn roıaltı tártibi qarastyrylady. Elimizdiń baı mıneraldy-shıkizattyq bazasy, jer qoınaýyn paıdalanýdaǵy zamanaýı zańnamasy men ashyq salyq júıesi jahandyq tizbektegi mańyzdy mıneraldardy jetkizý boıynsha strategııalyq ornymyzdy qamtamasyz etetinine senimdimiz, — dedi Prezıdent.
Budan buryn Aqordanyń resmı saıtyna Memleket basshysy Qasym-Jomart Toqaevtyń quqyq qorǵaý organdarynyń keńeıtilgen alqa májilisinde sóılegen sózi jarııalandy.