Elimizde ınvestıtsııalyq daýlardy sotqa deıin retteýdiń jańa tetigi quryldy
ASTANA. KAZINFORM — Bas prokýratýranyń Investorlardyń quqyqtaryn qorǵaý komıteti janynan ınvestorlar men memlekettik organdar arasyndaǵy daýlardy sotqa deıin retteý jónindegi komıssııa paıda boldy.
Jańa tetik ınvestıtsııalyq jobalardy iske asyrý barysynda týyndaıtyn kelispeýshilikterdi sotqa júginbeı sheshýge múmkindik beredi.
Tıisti Qaǵıdalar QR Bas prokýrorynyń buıryǵymen bekitildi. Komıssııa ınvestorlar men memlekettik organdar, jergilikti atqarýshy organdar, mekemeler jáne kvazımemlekettik sektor sýbektileri arasynda ınvestıtsııalyq qyzmetke tikeleı baılanysty týyndaıtyn daýlardy retteýdiń qosymsha quralyna aınalady.
Tájirıbege súıensek, ınvestıtsııalyq jobalardy iske asyrý barysynda kelispeýshilikterdi jedel sheshýdi talap etetin jaǵdaılar týyndaıdy. Olar memlekettik organdardyń sheshimderine, áreketterine nemese áreketsizdigine, mindettemelerdiń oryndalýyna, jobany iske asyrý úshin qajetti jaǵdaılardy jasaýǵa jáne ınvestıtsııalyq qyzmetke tikeleı baılanysty basqa da máselelerge qatysty bolýy múmkin. Mundaı jaǵdaılarda taraptar daýdy Investorlardyń quqyqtaryn qorǵaý komıteti janyndaǵy arnaıy alańǵa shyǵaryp, ınvestıtsııalyq salaǵa tikeleı qatysy bar uıymdardyń ókilderi qatysatyn alqaly tártippen qaraýǵa múmkindik alady.
— Bul tetiktiń negizgi maqsaty — ınvestıtsııalyq jobalardy iske asyrý barysynda týyndaýy múmkin daýly máselelerdi ýaqytyly sheship, ákimshilik sıpattaǵy kelispeýshilikterdiń ınvestıtsııalarǵa kedergi keltirýine jol bermeý, — dedi Investorlardyń quqyqtaryn qorǵaý komıtetiniń tóraǵasy Baýyrjan Eraly.
Bul rette Komıssııanyń quzyreti naqty rettelgen. Investıtsııalyq qyzmetke qatysy joq korporatıvtik, kommertsııalyq jáne ózge de azamattyq-quqyqtyq daýlar komıssııanyń quzyretine jatpaıdy.
Komıtet tóraǵasynyń aıtýynsha, árbir naqty keıs boıynsha istiń mán-jaıy eskerile otyryp, komıssııa bes laýazymdy tulǵadan quralady. Onyń quramyna Investorlardyń quqyqtaryn qorǵaý komıteti, «Atameken» Ulttyq kásipkerler palatasy jáne Syrtqy ister mınıstrliginiń Investıtsııalar komıtetiniń ókilderi kiredi. Qajet bolǵan jaǵdaıda beıindi memlekettik organdar da tartylýy múmkin.
Mańyzdysy, komıssııaǵa tek ınvestorlar ǵana emes, memlekettik organdar men ınvestıtsııalyq prokýror da júgine alady. Mundaı tásil ınvestıtsııalyq daý taraptary arasynda dıalog ornatyp, ony sheshýdiń ortaq joldaryn izdeýge múmkindik beredi.
— Biz bul tetikti eń aldymen ınvestorlardy jedel qorǵaýdyń quraly retinde qarastyramyz. Bizdiń mindetimiz — týyndaıtyn daýlardyń barynsha jyldam ári konstrýktıvti túrde sheshilýin qamtamasyz etip, ınvestıtsııalyq jobalardyń ákimshilik kedergilersiz iske asyrylýyna jaǵdaı jasaý, — dep atap ótti Baýyrjan Eraly.
Osylaısha, jańa tetik daýdy sot talqylaýyna jetkizbeı, ony sotqa deıingi kezeńde sheshýge baǵyttalǵan.
Budan buryn Almaty oblysynda ınvestorlardyń jumysyna kedergi keltirgen 18 sheneýnik jazalanǵanyn jazǵanbyz.
