Elimizde ınteraktıvti ınvestıtsııalyq karta ázirlendi
ASTANA. KAZINFORM – Qazaqstanda ınvestorlar men kásipkerlerge arnalǵan ınteraktıvti karta ázirlendi.
«Atameken» palatasy eldiń ınvestıtsııalyq tartymdylyǵyn arttyrýǵa baǵyttalǵan Qazaqstannyń ekonomıkalyq reformalary protsesine belsendi qatysady jáne sheteldik ınvestıtsııalar úshin «ashyq esik» saıasatyn ustanamyz. Úkimetpen turaqty jáne boljamdy salyq rejımin qamtamasyz etý, sot júıesin jetildirý jáne ádil kásipkerlik ortany qurý boıynsha yntymaǵymyz berik. Ulttyq palata beıindi memlekettik organdar jáne uıymdarmen birlesip «bir tereze» qaǵıdaty arqyly memlekettik qoldaý sharalaryna ashyq jáne teń qoljetimdilikti qamtamasyz etý úshin tsıfrlyq ekojúıeni qurý úshin belsendi jumys isteıdi», - dedi «Atameken» ulttyq kásipkerler palatasynyń tóraǵasy Raıymbek Batalov elordada ótken ShYU múshe elder ókilderiniń qatysýymen ótken iskerlik keńes otyrysynda.
Sondaı-aq, palata basshysy tsıfrlyq ınteraktıvti ınvestıtsııalyq karta ázirlengenin tilge tıek etti.
«Birinshiden, ınteraktıvti karta jergilikti jerlerde ınvestıtsııalyq jobalardyń neǵurlym obektıvti iske asyrylýyn baqylaýǵa múmkindik beredi. Ekinshiden, óńir jáne tutastaı el aýqymynda shaǵyn jáne orta bıznesti damytýdyń negizgi kórsetkishteriniń monıtorıngi. Sonymen qatar, bul karta ınvestorlar men ınvestıtsııalyq usynystar týraly aqparatty biriktiretin biregeı derekqor. Karta áleýetti ınvestorlarǵa Qazaqstandaǵy múmkindikter men jobalar, sondaı-aq bıznesti júrgizý sharttary týraly tolyq málimet alýǵa múmkindik beredi. ShYU iskerlik keńesiniń qurmetti músheleri men bıznes ókilderin osy platformaǵa qatysýǵa shaqyramyn», - deıdi ol.
Buǵan deıin habarlaǵanymyzdaı, Qazaqstannyń ShYU elderimen taýar aınalymy 66 mlrd dollarǵa jetken.
Sondaı-aq, ShYU elderinen byltyr Qazaqstanǵa 4,6 mlrd AQSh dollar kóleminde ınvestıtsııa tartylǵan.
Aıta ketsek, ShYU elderi birlesken ınjınırıngtik hab qurý usynyldy.
