Elimizde ınklıýzıvti bilim berý jónindegi Dúnıejúzilik kongress ótedi
ASTANA. KAZINFORM – Bıyl 15–17 qazan aralyǵynda Almaty qalasynda ınklıýzıvti bilim berý salasyndaǵy eń iri halyqaralyq is-shara – World Inclusion Congress (WIC 2025) Dúnıejúzilik kongresi ótedi. Bul týraly Oqý-aǵartý mınıstrligi habarlady.
Inklıýzıvti bilim berý – Qazaqstannyń memlekettik saıasatynyń basty basymdyqtarynyń biri.
Memleket basshysy Qasym-Jomart Toqaev barlyq balaǵa, olardyń fızıkalyq, psıhıkalyq jáne áleýmettik erekshelikterine qaramastan, teń múmkindik jasaýdyń mańyzdylyǵyna erekshe nazar aýdaryp keledi.
2021 jyly «Inklıýzıvti bilim berý máseleleri boıynsha Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» Zańynyń qabyldanýymen erekshe bilim berý qajettilikteri bar balalar úshin bilim berýdiń barlyq deńgeıinde arnaıy jaǵdaı jasala bastady.
2025 jyldyń basynda Londonda ótken álemdegi eń iri Bett Show halyqaralyq kórmesinde alǵashqy Dúnıejúzilik ınklıýzııa kongresiniń Qazaqstanda ótetini resmı jarııalandy.
Kongress Qazaqstan Oqý-aǵartý mınıstrligi men Almaty qalasy ákimdiginiń qoldaýymen ótkiziledi. Іs-sharanyń bastamashylary — Ulybrıtanııadaǵy International Forums of Inclusion Practitioners (IFIP) jáne Qazaqstandaǵy «HOPE» (Help Others Pursue Education) qory.
Kongresste is júzindegi tájirıbege, úshjaqty tásilge (pedagogıkalyq ınnovatsııalar, tehnologııalyq jetistikter jáne korporatıvtik seriktestik), sondaı-aq jasandy ıntellekt pen jańa tehnologııalardy engizýge erekshe nazar aýdarylady.
Oǵan 40 elden 1200-den astam delegat qatysady dep josparlanyp otyr. Olardyń qatarynda mınıstrler, sarapshylar, halyqaralyq uıymdar men jetekshi ýnıversıtetterdiń, zertteý ortalyqtarynyń jáne EdTech kompanııalardyń ókilderi bar. Álemdik korporatıvtik kóshbasshylardyń qatysýy strategııalyq múmkindikterge jol ashyp, Qazaqstanǵa álemniń nazaryn aýdaryp qana qoımaı, ınvestıtsııalar tartýǵa jol ashady.
Kongress aıasynda «Inklıýzıvti bilim berýdegi jahandyq úrdister: syn-qaterler men sheshimder» taqyrybynda dóńgelek ústel, halyqaralyq yntymaqtastyq pen ınklıýzııa saıasatynyń ınnovatsııalaryna arnalǵan plenarlyq sessııalar jáne úzdik tájirıbeler almasý alańdary qarastyrylǵan.
Sonymen qatar, otandyq jáne sheteldik kompanııalardyń qatysýymen bilim berý, tsıfrlyq tehnologııalar men qoljetimdi orta qalyptastyrý jónindegi ınnovatsııalyq kórme uıymdastyrylady.
Іs-shara barysynda ınklıýzıvti bilim berýdiń ári qaraı damýyna baǵyt beretin mańyzdy halyqaralyq qujat – Almaty deklaratsııasynyń jobasy talqylanady.
Inklıýzıvti bilim berýde psıhologııalyq-pedagogıkalyq qoldaýdyń úsh deńgeıli modeli engizilip jatqanyn jazǵan bolatynbyz.