Elimizde halyqty tabıǵı gazben qamtý deńgeıi 80%-ǵa deıin ulǵaıtylmaq
ASTANA. KAZINFORM — Energetıka mınıstrligi gazdandyrý deńgeıin 80%-ǵa jetkizý jónindegi Jol kartasyn ázirleýge kiristi. Bul týraly vedomstvonyń baspasóz qyzmeti málim etti.
Memleket basshysy Qasym-Jomart Toqaev Parlament palatalarynyń birlesken otyrysynda sóılegen sózinde eldi gazdandyrý qarqynyn jedeldetip, halyqty tabıǵı gazben qamtý deńgeıin 80%-ǵa jetkizýdi tapsyrdy.
Prezıdent tapsyrmasyn oryndaý maqsatynda Qazaqstan Respýblıkasy Energetıka mınıstrligi qoıylǵan maqsatqa kezeń-kezeńimen qol jetkizýge baǵyttalǵan keshendi Jol kartasyn ázirleýdi bastady.
Mınıstrliktiń málimetinshe, jalpy, Qazaqstandy gazdandyrý azamattardyń ómir súrý sapasyn arttyrýǵa, óńirlerdi damytýǵa jáne eldiń energetıkalyq qaýipsizdigin nyǵaıtýǵa baǵyttalǵan 2035 jylǵa deıingi Bas shema aıasynda júzege asyrylyp jatyr.
— Byltyrǵy jyldyń qorytyndysy boıynsha gazben jabdyqtaý salasynda iske asyrylǵan 84 joba nátıjesinde 94 eldi mekenniń 354 myńnan astam turǵyny tabıǵı gazǵa qol jetkizdi. Bir jyl ishinde 2 myń shaqyrym gaz taratý jelisi salyndy. Sonyń nátıjesinde tabıǵı gazǵa qol jetkizgen turǵyndar sany 20,5 mıllıon halyqtyń 13,1 mıllıonyna jetti, — delingen habarlamada.
Bıylǵy jyly gaz tasymaldaý ınfraqurylymyn damytý jobalaryn iske asyrý nátıjesinde taǵy 36 myńǵa jýyq turǵyn tabıǵı gazǵa qol jetkizedi.
Ázirlenip jatqan Jol kartasy eldi gazdandyrýdy jedeldetý jónindegi negizgi strategııalyq qujatqa aınalady. Ony iske asyrý tabıǵı gazben qamtylatyn halyqtyń úlesin edáýir arttyrýǵa, Memleket basshysy qoıǵan mindettiń oryndalýyn qamtamasyz etýge, azamattardyń ómir súrý sapasyn jaqsartýǵa jáne óńirlerdiń ornyqty áleýmettik-ekonomıkalyq damýyna qosymsha serpin berýge múmkindik beredi.
Eske sala keteıik, Premer-mınıstr bir aıda Qazaqstandy gazdandyrý josparyn jańartýdy tapsyrǵan bolatyn.
