Elimizde gıpermasshtabtalatyn derekterdi óńdeıtin eń iri ortalyq qurylady

ASTANA. KAZINFORM – Qazaqstanda sıngapýrlyq ınvestorlar – GK Hyperscale Ltd kompanııasynyń qatysýymen gıpermasshtabtalatyn derekterdi óńdeý ortalyqtaryn (DÓO) salý boıynsha strategııalyq mańyzdy joba iske qosylady. Premer-mınıstr Oljas Bektenov Investormen kelisim týraly tıisti qaýlyǵa qol qoıdy.

Atap aıtqanda, qujatta Aqmola jáne Qaraǵandy oblystarynda jalpy qýaty 200 MVt bolatyn eki birdeı derekterdi óńdeý ortalyǵyn salý jáne paıdalanýǵa berý úshin 690 mlrd teńge kóleminde ınvestıtsııa tartý kózdelgen.

Úkimet atynan Tsıfrlyq damý mınıstrligi jobany júzege asyrýǵa, onyń memlekettik tsıfrlyq ekojúıege ıntegratsııalanýyn qamtamasyz etýge, sondaı-aq «bultty» tehnologııalar men joǵary ónimdi esepteýlerdi (HPC) damytý úshin normatıvtik jaǵdaı qalyptastyrýǵa belsendi túrde qatysady. Mundaı ortalyqtardy qurý Qazaqstanǵa Microsoft, Google jáne Amazon sııaqty halyqaralyq tehnologııa alpaýyttaryn, sondaı-aq úlken derektermen jáne mashınalyq oqytýmen jumys isteıtin kompanııalardy tartýǵa múmkindik beredi.

Joba jalaqy deńgeıi joǵary jumysoryndaryn ashý jáne tehnologııalyq táýelsizdikti qamtamasyz etý arqyly tsıfrlyq ekonomıkany damytýdyń qozǵaýshy kúshine aınalady. Qazaqstan IT-qyzmetter eksportyn edáýirarttyryp, halyqaralyq naryqtarda jergilikti IT-kompanııalardyń qatysýyn keńeıtedi jáne onyń jahandyq tsıfrlyq ekojúıelerdegi rólin kúsheıtedi dep kútilýde.

Osylaısha, DÓO iske qosylýy elimizdiń Ortalyq Azııanyń tsıfrlyq haby retindegi ornyn nyǵaıtady ári IT-qyzmetter eksportynyń ósýine jaǵdaı jasaıdy.

Qurylystyń birinshi kezegi 2027 jyly, al DÓO 2030 jyly tolyq iske qosylady dep josparlanǵan.

Aıta keteıik, Aldaǵy 4 jylda elimizde jyl saıyn 200-ge jýyq ınvestıtsııalyq joba iske qosylady.