Elimizde Germanııanyń qandaı ýnıversıtetteriniń fılıaly ashylady
ASTANA. KAZINFORM – Búgin Aqordada Ǵylym jáne joǵary bilim mınıstri Saıasat Nurbek elimizde Germanııanyń qandaı ýnıversıtetteriniń fılıaly men ǵylymı-zertteý ortalyqtary ashylatyndyǵyn aıtty.
«Nemis kantsleri Olaf Sholtstiń elimizge sapary aıasynda 6 negizgi qujatqa qol qoıylady. Birinshiden, Almaty energetıka jáne baılanys ýnıversıteti negizinde belgili Anhalt ýnıversıtetiniń fılıaly ashylady. Energetıka, elektr energetıkasy sııaqty birneshe baǵdarlamamen bastaımyz. Ekinshiden Aqtaýdaǵy Sh.Esenov atyndaǵy Kaspıı tehnologııalar jáne ınjınırıng ýnıversıtetinde turaqty ınjınırıng fılıaly ashylady. Bul Berlın tehnıkalyq ýnıversıtetiniń fılıaly. «2+1» formýlasymen jumys isteımiz, ıaǵnı eki jyl Qazaqstanda bir jyl Germanııada, taǵy bir jyl óndiriste», - dedi mınıstr.
Onyń atap ótýinshe, munan bólek, Prezıdent janyndaǵy Ulttyq ǵylym akademııasynyń janynda Qazaqstan-nemis ǵylymı ortalyǵy, Óskemen qalasyndaǵy Shyǵys Qazaqstan tehnıkalyq ýnıversıtetinde metallýrgııa jáne ken baıytý salasyndaǵy arnaıy ǵylymı-zertteý ortalyǵy ashylady.
«Oǵan birqatar ýnıversıtet kiredi. Negizgi maqsat – metallýrgııa, sırek metaldar, ken baıytý baǵytynda birlesken ǵylymı jobalarmen aınalysý. Besinshisi – L.N.Gýmılev atyndaǵy Eýrazııa ulttyq ýnıversıtetiniń negizinde nemis til úırený ortalyǵy. Búgin ony resmı ashamyz. Sońǵy jyldary nemis tili umytylyp ketti. Buryn nemis tili mektep, joǵary oqý deńgeıinde jaqsy oqytylǵan. Qazir múldem qalǵan joq. Sońǵy kelisimshart – Almatydaǵy ulttyq agrarlyq ýnıversıtet negizinde sý sharýashylyǵy ǵylymı-zertteý ortalyǵyn ashý. Qazirgi tańda sý úlken máselege aınaldy. Sondyqtan arnaıy praktıkalyq qoldanbaly ǵylymı-zertteý ortalyǵy bolady», - dedi Saıasat Nurbek.
Osyǵan deıin Memleket basshysy Qasym-Jomart Toqaev Astanaǵa resmı saparmen kelgen Germanııanyń Federaldyq kantsleri Olaf Sholts Aqordada qarsy alǵanyn jazdyq.
