Elimizde gaz tutyný normasy bekitilmek
ASTANA. KAZINFORM — Elimizde gaz tutyný normadan asqan jaǵdaıda baǵa belgileýde saralanǵan tásil qoldanylýy múmkin. Bul týraly Májilistiń jalpy otyrysynda depýtat Edil Jańbyrshın aıtty.
— Qoldanystaǵy baǵa belgileý júıesi gazdy naqty tutyný kólemin eskermeıdi. Sonymen qatar óńirlerdiń klımattyq erekshelikteri nazarǵa alynbaıdy. Máselen, jyly óńirde ornalasqan aýdany 200 sharshy metr turǵyn úı sýyq klımatty óńirdegi osyndaı úıge qaraǵanda gazdy kóbirek tutynady. Alaıda bul aıyrmashylyq baǵa belgileýde kórinis tappaıdy, — dedi Edil Jańbyrshın gazben jabdyqtaý jáne gazdy únemdi tutyný máseleleri boıynsha zań jobasyn tanystyra kele.
Onyń paıymynsha, bul áleýmettik ádilettilik qaǵıdatyn buzyp, gazdy únemdeýge yntalandyrmaıdy.
— Osyǵan baılanysty zań jobasynda tutyný normalaryn bekitý jáne belgilengen normadan asqan jaǵdaıda baǵa belgileýge saralanǵan tásil qoldaný usynylady. Mundaı ádis sý jáne energetıka salasynda qoldanyp otyr. Aıta ketý kerek, mundaı tetik Ázerbaıjan men Ózbekstanda burynnan engizilgen, — dedi depýtat.
Aıta keteıik, taýarlyq gazdy únemdep paıdalaný mádenıetin qalyptastyrýǵa, sondaı-aq jeke jáne kommýnaldyq tutynýshylar úshin saralanǵan tarıf saıasatyn qurýǵa baǵyttalǵan zań jobasyna qatysty Edil Jańbyrshın Kazinform tilshisine suhbat bergen edi.