Elimizde Ǵalymdar quqyǵy jónindegi ombýdsmen ınstıtýty qurylady
ASTANA. KAZINFORM — Ombýdsmen endi ǵalymdar men ǵylymı qyzmetkerlerdiń quqyqtaryn tikeleı qorǵaıtyn bolady. Bul týraly Májilis depýtaty Ashat Aımaǵambetov áleýmettik jelidegi paraqshasynda jazdy.
— Biz usynǵan túzetýler zań bolyp bekitildi. Endi Qazaqstanda alǵash ret zań júzinde ǵalymdardyń quqyǵy men akademııalyq bostandyǵy týraly naqty kepildikter beretin normalar paıda boldy. Buǵan qosa, arnaıy jańa ınstıtýt — Ǵalymdar quqyǵy jónindegi ombýdsmen ınstıtýty engiziledi, — dep jazdy Aımaǵambetov.
Depýtat bul ózgerister naqty ne beretinin túsindirdi.
— Birinshiden, zań júzinde akademııalyq bostandyq kepildendiriledi. Endi árbir ǵalymnyń zertteý baǵytyn óz qalaýymen erkin tańdaýǵa, syrtqy qysymsyz óziniń ǵylymı pikirin ashyq bildirýge jáne halyqaralyq ǵylymı qaýymdastyqtarǵa emin-erkin múshe bolýǵa tolyq quqyǵy zańda jazyldy. Ekinshiden, Ǵalymdar quqyǵy jónindegi ombýdsmen ınstıtýty qurylady. Ony biz Ulttyq ǵylym akademııasynyń janynan ashylsyn dep usyndyq. Bul ýákiletti tulǵa endi ǵalymdar men ǵylymı qyzmetkerlerdiń quqyqtaryn tikeleı qorǵaıtyn bolady, — dedi ol.
Ol Ombýdsmen naqty nemen aınalysatynyn tizip berdi. Atap aıtqanda:
• Ǵalymdar men ǵylymı qyzmetkerlerdiń quqyqtarynyń buzylýyna qatysty ótinishter men shaǵymdardy tikeleı qaraıdy.
• Ǵalymdardyń quqyqtary men zańdy múddelerin qorǵaý boıynsha konsýltatsııalyq kómek beredi.
• Memlekettik organdarmen, bilim jáne ǵylym uıymdarymen ǵalymdardyń múddesin qorǵaý úshin tikeleı ózara is-qımyl jasaıdy.
• Ǵalymdardyń quqyqtaryn qorǵaýdy jaqsartý maqsatynda ǵylym jáne tehnologııalyq saıasat jónindegi zańnamany jetildirýge baılanysty Ulttyq akademııaǵa jáne ýákiletti organǵa usynystar engizedi.
— Memleket basshysy Qasym-Jomart Toqaev ǵylymdy árqashan qoldaıdy. Jańa zańnamalyq saıasatta bul — basty basymdyq, — dep túıindedi Ashat Aımaǵambetov.
Buǵan deıin doktoranttarǵa grant kóbeıip, jas ǵalymdarǵa qoldaý kúsheıgenin jazǵanbyz.
