Elimizde fonogrammaǵa tyıym salý normasy qaı jaǵdaıda qoldanylady

ASTANA. KAZINFORM — QR Mádenıet jáne aqparat vıtse-mınıstri Aıbek Sydyqov kontsertterde fonogrammaǵa tyıym salý normasyna qatysty túsinik berdi.

- Daýystyq (vokaldyq) fonogrammalarǵa shekteý qoıý josparlanǵan. Jalpy, fonogrammanyń aýqymy úlken. Bul zańdy Parlamentte pysyqtaý barysynda tek daýystyq (vokaldyq) fonogrammalarǵa tyıym salýdy qarastyrdyq. Atap aıtqanda, osy norma kontserttik oıyn-saýyq mádenı-buqaralyq is-sharalarǵa qatysty, ıaǵnı 200 kórermennen astam is-sharalarda fonogramma paıdalanýǵa tyıym salynady, - dedi A.Sydyqov Senattyń jalpy otyrysynan keıin tilshiler suraǵyna jaýap bere otyryp.

Sonymen qatar ol kontserttik oıyn-saýyq mádenı-buqaralyq is-sharalardy ótkizýge beıimdelmegen oryndar bar ekenin aıtty. Osy oraıda kósheler men alańdarda, ıppodrom sııaqty nysandarda fonogrammaǵa tyıym salynbaıdy. Biraq, osyǵan qatysty uıymdastyrýshylar tıisti habarlama jasaýǵa mindetteledi.

- Munymen qosa, televızııalyq jazbalar kezinde fonogrammaǵa ruqsat beriledi. Atap aıtqanda, búgin Senattyń jalpy otyrysynda senatorlar qujattyń jekelegen baptaryn jańa redaktsııada usynyp, ony Májiliske qaıtardy. Bul turǵyda Májilis depýtattary usynǵan normalarǵa redaktsııalyq sıpattaǵy tolyqtyrý engizildi, - dedi vıtse-mınıstr.

Aıta keteıik, Senattyń jalpy otyrysynda A.Sydyqov fonogrammaǵa tyıym salý maqsatynda Ákimshilik quqyq buzýshylyq týraly kodekske jańa norma engizilip jatqanyn málim etti. Bul rette, 1 myń AEK-ke deıin aıyppul salý eskerilmek. Osy tyıymdy júzege asyrýdy jergilikti atqarýshy organdar qadaǵalaıdy.

Budan buryn habarlanǵandaı, Senat fonogrammany paıdalanýdy shekteý týraly zańdy Májiliske qaıtardy.