Elimizde farmatsevtıkalyq óndiris kólemi 8,2%-ǵa ósti
ASTANA. KAZINFORM — Byltyr atalǵan salada 191,1 mlrd teńgeniń taýary óndirilgen. Bul jóninde QR Densaýlyq saqtaý mınıstrligi resmı saýalymyzǵa joldaǵan jaýabynda málimdedi.
— Ulttyq statıstıka bıýrosynyń derekterine sáıkes, 2025 jyldyń qorytyndysy boıynsha farmatsevtıkalyq óndiris kólemi 8,2%-ǵa ósip, 191,1 mlrd teńgege jetti. Bul kórsetkish 2024 jyly 175,8 mlrd teńge bolǵan. Al 2026 jyldyń qańtar aıyndaǵy farmatsevtıkalyq óndiris kólemi — 15,7 mln teńge, — delingen habarlamada.
Sondaı-aq mınıstrliktiń málimetinshe, búgingi tańda elimizde 209 qazaqstandyq taýar óndirýshi tirkelgen. Olardyń 43-i dárilik zattardy, qalǵandary medıtsınalyq buıymdardy óndiredi.
Buǵan deıin habarlaǵanymyzdaı, farmatsevtıkalyq ónimder óndirisi salasynda 316,3 mlrd teńge somasyna 6 ınvestıtsııalyq kelisim jasaldy. Sonyń arqasynda dárilik zattyń 400-deı túri óndirilip, 1100-den astam turaqty jumys orny qurylmaq.