Elimizde et ónimderiniń quramyn anyqtaıtyn PTR-test ázirlendi
ASTANA. KAZINFORM — Qazaqstanda ettiń túrlik quramyn anyqtaýǵa jáne et ónimderinde shıkizattyń basqa túrimen almastyrylýyn anyqtaýǵa múmkindik beretin otandyq PTR-test ázirlendi. Test-júıeni «Ulttyq agrarlyq ǵylymı-bilim berý ortalyǵy» quramyna kiretin S. Seıfýllın atyndaǵy Qazaq agrotehnıkalyq zertteý ýnıversıtetiniń ǵalymdary ázirledi.
Aýyl sharýashylyǵy mınıstrliginiń habarlaýynsha, shujyq ónimderiniń, jartylaı fabrıkattardyń, konservilerdiń jáne basqa da ónimderdiń naqty quramy qaptamada kórsetilgen aqparatqa sáıkes kelmeýi múmkin.
Ásirese, etti usaqtaǵannan, termııalyq óńdeýden ótkizgennen nemese ártúrli shıkizat túrlerin aralastyrǵannan keıin onyń basqa túrmen almastyrylǵanyn anyqtaý qıyn. Mundaı jaǵdaıda shıkizattyń shyǵý tegin syrtqy belgilerine qarap anyqtaý is júzinde múmkin emes.
PTR-test mıtohondrııalyq tsıtohrom b geniniń túrge tán jerlerin anyqtaý arqyly 17 túrli janýar men qustyń DNQ-syn aıqyndaýǵa múmkindik beredi.
Olardyń ishinde úı janýarlarynyń segiz túri — iri qara, jylqy, shoshqa, qoı, eshki, esek, ıt jáne mysyq, jabaıy janýarlardyń alty túri — aqbóken, maral, elik, arqar, egeýquıryq jáne tyshqan, sondaı-aq qustardyń úsh túri — taýyq, úırek jáne kúrketaýyq bar.
— Test-júıeniń negizgi erekshelikteriniń biri — bir úlginiń quramynan birneshe janýar túriniń DNQ-syn bir mezgilde anyqtaý múmkindigi. Mundaı mýltıpleksti format jeke-jeke júrgiziletin taldaýlardyń sanyn jáne reagentterdiń shyǵynyn azaıtýǵa múmkindik beredi. Bul ásirese birneshe quramnan turatyn et ónimderin zertteý kezinde mańyzdy, — delingen habarlamada.
Bul ádis paıdaly modelge berilgen patentpen qorǵalǵan. Test-júıeni óndirý jáne qoldaný úshin qajetti ǵylymı-tehnıkalyq qujattama ázirlenip, ýnıversıtettiń ǵylymı-tehnıkalyq keńesiniń sheshimimen bekitildi.
PTR-test shıki etti de, sondaı-aq shujyq ónimderi, vetchına jáne et konservilerin qosa alǵanda, qaıta óńdelgen et ónimderin de zertteýge arnalǵan. Test-júıeni synaq jáne veterınarııalyq zerthanalar, memlekettik baqylaý organdary, tamaq ónerkásibi kásiporyndary jáne azyq-túlik ónimderiniń sapasy men qaýipsizdigin baqylaýdy júzege asyratyn basqa da uıymdar paıdalana alady.
Ettiń túrlik quramyn anyqtaý ónimniń tańbalaýynda kórsetilgen aqparatqa sáıkessizdikterdi anyqtaýǵa, tutynýshylardyń quqyqtaryn qorǵaýǵa jáne veterınarııalyq-sanıtarııalyq baqylaý mindetterin sheshýge múmkindik beredi.
Eske salaıyq, buǵan deıin BQO-da 84,5 tonna zalaldanǵan ónim Qazaqstanǵa kirgizilmegenin jazǵanbyz.
