Elimizde esirtkiniń qaı túri kóp taralǵan
Qazaqstanda esirtkiniń jyl saıynǵy zańsyz aınalymy shamamen 20-25 tonnadan quraıdy. Bul týraly Májilis depýtaty Danııa Espaeva aıtty, dep habarlaıdy Kazinform.
«Qazir esirtki álem boıynsha eń kúrdeli syn-qaterleriniń biri. Esirtki - tirshilikti qamtamasyz etetin barlyq salanyń damý protsestigine áser etip otyr. Keıingi 10 jylda dúnıejúzinde esirtkige táýeldi adamdardyń sany 23 paıyzǵa, ıaǵnı 240 mln adamnan 296 mln adamǵa deıin ósken. BUU málimetinshe, esirtkini paıdalaný aýqymy jáne olardyń zańsyz aınalymy jappaı taralyp, elderdiń ulttyq qaýipsizdigine qaýip tóndirip otyr. Mundaı problema bizdiń elde de bar. Qazaqstanda esirtkiniń jyl saıynǵy zańsyz aınalymy shamamen 20-25 tonnadan quraıdy. Onyń 95 paıyzdan astamy kannabıs tobyndaǵy esirtkige, 5 paıyzǵa jýyǵy sıntetıkalyq, sondaı-aq 1 paıyzdan azy apıynǵa, geroınǵa jáne ózge de túrlerine tıesili», - dedi D. Espaeva Májilistegi esirtki qylmysymen kúres sharalaryna arnalǵan Úkimet saǵatynda.
Ýákiletti organdar usynǵan statıstıkalyq derekterge sáıkes, elimizde byltyr esirtki qylmysy úshin sottalǵandardyń sany 3 myń 425 adamdy, al bıylǵy 10 aıda 3 myń 193 adamdy qurady. Bul kórsetkish - elimizde sottalǵan adamdardyń jalpy sanynyń 14 paıyzy.
«2018 jyly qarashada Parlament esirtki men psıhotropty zattardyń zańsyz aınalymyn baqylaýǵa qatysty zańnamalyq túzetýlerdi qabyldady. Osy zańda Úkimetke esirtki men psıhotropty zattar tizimin bekitý quzyreti berildi. Bul osy tizimde jańadan anyqtalǵan esirtkini jedel engizýge múmkindik berdi», - dedi depýtat.
