Elimizde esirtki satqan 3 myńnan astam Telegram kanal buǵattaldy
ASTANA. KAZINFORM – Esirtki taratyp, satqan nemese jasyryn jarnamalaǵan Telegram kanaldar sońǵy úsh jyldyń ishinde anyqtalyp otyr.
«Bizdiń qordyń «Mergen» atty jumys algorıtmi bar, ol jasandy ıntellekti arqyly jumys isteıdi. 2021 jyldan beri el aýmaǵynda óz kúshimizben esirtki taratqan nemese jasyryn jarnama jasaǵan 3 myńnan astam Telegram kanaldy buǵattadyq. Oǵan qosa biz quqyq qorǵaý organdarymen birlesip jumys istep jatyrmyz. Esirtkimen kúreske kez kelgen adam qatysyp, kúmándi QR kodty kórse, foto, vıdeoǵa túsirip, anyqtaýǵa úlesin qosa alady. Múmkindiginshe kúmándi jaıttar týraly tez arada aıtqan abzal, sol arqyly biz jyldam áreket jasap, esirtki taratýdyń aldyn alyp nemese joıa alamyz», - dedi «ESBOL» qorynyń tóraǵasy Jandos Aqtaev BAQ ókilderiniń saýalyna jaýap bere turyp.
Aıta keteıik, búgin Astanada esirtki qylmysynyń digital-kartasy iske qosyldy.
Elordada esirtkini taratý, satý, satyp alý jáne ony jasyryn jarnamalaýdy joıýmen aınalysatyn arnaıy saıt (esbol.kz) iske qosyldy. Oǵan nashaqorlyqqa qatysty kez kelgen aqparatty jiberip, habarlaýǵa bolady.
