Elimizde esirtki óndiretinder ómir boıyna bas bostandyǵynan aıyrylýy múmkin
ASTANA. KAZINFORM – Búgin Májilistiń jalpy otyrysynda esirtkige qarsy is-qımyl júıesin jetildirýge baǵyttalǵan qujat birinshi oqylymda qaraldy. Osy zań jobasy aıasynda esirtki óndiretinderdi jáne esirtki zerthanalaryn qurǵandardy ómir boıyna bas bostandyǵynan aıyrý usynyldy.
«Biz osy zań jobasyna qoldaý bildirdik, sebebi qazirgi jaǵdaı jazany kúsheıtýdi talap etip otyr. Endi jazany saralaý usynylyp otyr. Elimizde qazir esirtkini jasyratyndar esirtki óndirýshimen birdeı jaza alady. Bul zań talaptaryn kúsheıtsek, bizde saralanǵan jaza engizilip, esirtki óndiretinder 15 jyldan ómir boıyna bas bostandyǵynan aıyrý jazasyna tartylýy múmkin. ıAǵnı esirtki jasyratyndarǵa qatysty burynǵy jaýapkershilik saqtalady, al zerthana qurǵandarǵa jaza kúsheıtilmek. Zań jobasy birinshi oqylymda maquldandy. Endi bul usynystar talqylanady», - dedi Іshki ister mınıstriniń orynbasary Aıdos Rysbaev Parlament Májilisinde tilshiler suraǵyna jaýap bere otyryp.
Onyń aıtýynsha, elimizde jalpy 36 myń adam túrmede otyr. Sonyń 4 myńnan astamy esirtki qylmysyna qatysty jazasyn ótep jatyr.
Budan buryn habarlanǵandaı, búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine esirtki, psıhotroptyq zattardyń jáne olardyń prekýrsorlarynyń zańsyz aınalymyna qarsy is-qımyl máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.